ವೀರಾಜಪೇಟೆ, ಜೂ. 7 : ವೀರಾಜಪೇಟೆಯ ತೆಲುಗರ ಬೀದಿಯ ಅಂಗಾಳಪರಮೇಶ್ವರಿ ದೇವಾಲಯದ ಬಳಿ ಆಟೋ ರಿಕ್ಷಾ ಮೋಟಾರ್ ಸೈಕಲ್ ನಡುವೆ ಅವಘಡ ಸಂಭವಿಸಿ ಸವಾರನ ಸ್ಥಿತಿ ಗಂಭೀರವಾಗಿದೆ.

ಇಂದು ಬೆಳಿಗ್ಗೆ ಸುಂಕದ ಕಟ್ಟೆಯಿಂದ ದೊಡ್ಡಟ್ಟಿ ಚೌಕಿ ಕಡೆಗೆ ತೆರಳುತ್ತಿದ್ದ (ಕೆ.ಎ.12ಎ 6870) ಆಟೋ ರಿಕ್ಷಾ ಇಲ್ಲಿನ ತೆಲುಗರ ಬೀದಿಯಲ್ಲಿ ರಸ್ತೆಗೆ ಅಡ್ಡ ಬಂದ ಮಗುವಿಗೆ ಡಿಕ್ಕಿಯಾಗುವದನ್ನು ತಪ್ಪಿಸಿದಾಗ ನಿಯಂತ್ರಣ ತಪ್ಪಿ ಬಲ ಬದಿಗೆ ಮಗುಚಿಕೊಂಡಿದೆ. ಚಾಲಕ ರಜನಿ ಎಂಬಾತನಿಗೆ ತೀವ್ರ ಸ್ವರೂಪದ ಗಾಯ ಉಂಟಾಗಿದೆ. ಆಟೋ ರಿಕ್ಷಾ ಮಗುಚಿಕೊಳ್ಳುವ ಸಮಯದಲ್ಲಿ ಸಿದ್ದಾಪುರದ ಕಡೆಯಿಂದ ಬಂದ ಮೋಟಾರ್ ಸೈಕಲ್ ನಿಯಂತ್ರಣ ತಪ್ಪಿ ಮಗುಚಿ ಬಿದ್ದ ಆಟೋ ರಿಕ್ಷಾದ ಒಂದು ಬದಿಗೆ ಡಿಕ್ಕಿಯಾದ ಪರಿಣಾಮ (ಕೆ.ಎ.14 ಕ್ಯೂ 623) ಆಬೂ ಎಂಬಾತನ ಬಲ ಕಾಲು ಮುರಿದಿದ್ದು, ಆತನ ಪರಿಸ್ಥಿತಿ ಗಂಭೀರವಾಗಿದ್ದು, ಗಾಯಾಳು ಆಬೂವನ್ನು ಮಂಗಳೂರಿಗೆ ಸಾಗಿಸಲಾಗಿದೆ. ಆಟೋ ರಿಕ್ಷಾದಲ್ಲಿ ಪ್ರಯಾಣಿಸುತ್ತಿದ್ದ ಗರ್ಭಿಣಿ ಮಹಿಳೆ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.

ವೀರಾಜಪೇಟೆ ನಗರ ಪೊಲೀಸರು ಆಟೋ ರಿಕ್ಷಾ ಚಾಲಕ ರಜನಿ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ.