ಮಡಿಕೇರಿ, ಡಿ. 18: ಪರದಂಡ ಪ್ರಾರ್ಥನಾ ಸುಬ್ರಮಣಿ 22ರ ಹರೆಯದ ಯುವತಿ ಕೊಡಗಿನವಳು. ಈಕೆ ಮೂಲತಃ ಅಥ್ಲೇಟ್ ಪಟು. ಆದರೆ ಕ್ರೀಡೆಯಲ್ಲಿ ಮುಂದುವರಿದಿಲ್ಲ. ಪ್ರಸ್ತುತದ ಉದ್ಯೋಗ ಸೈಸ್ ಜೆಟ್‍ನಲ್ಲಿ ಗಗನಸಖಿ. ಇದರೊಂದಿಗೆ ಮಾಡಲಿಂಗ್‍ನತ್ತ ಆಕರ್ಷಿಸಲ್ಪಟ್ಟ ಪ್ರಾರ್ಥನಾ ಇದೀಗ ಮಿಸ್ ದಿವಾ ಆಫ್ ಇಂಡಿಯಾ - 2017 ಸೌಂದರ್ಯ ಸ್ಪರ್ಧೆಯ ವಿಜೇತೆಯಾಗಿದ್ದಾಳೆ. ತಾ. 17 ರಂದು ದೆಹಲಿಯಲ್ಲಿ ನಡೆದ ಸೌಂದರ್ಯ ಸ್ಪರ್ಧೆಯ ಅಂತಿಮ ಸುತ್ತಿನಲ್ಲಿ ಕರ್ನಾಟಕದಿಂದ ಏಕೈಕ ಸ್ಪರ್ಧಿಯಾಗಿದ್ದ ಪ್ರಾರ್ಥನಾ ಮಿಸ್ ದಿವಾ ಆಫ್ ಇಂಡಿಯಾ ಸೀಜನ್ -2, 2017ರಲ್ಲಿ ವಿಜೇತಳಾಗಿ ಹೊರಹೊಮ್ಮಿದ್ದಾಳೆ.

ಈ ಸ್ಪರ್ಧೆಯಲ್ಲಿ ದೇಶದ ವಿವಿಧೆಡೆಯಿಂದ 14 ಸ್ಪರ್ಧಿಗಳು ಪಾಲ್ಗೊಂಡಿದ್ದು, ಅಂತಿಮ ಸುತ್ತಿಗೆ ಕರ್ನಾಟಕದಿಂದ ಪ್ರಾರ್ಥನಾ ಸೇರಿದಂತೆ ದೆಹಲಿ ಹಾಗೂ ಚಂಡೀಗಡದ ಇಬ್ಬರು ಅರ್ಹತೆ ಗಿಟ್ಟಿಸಿದ್ದರು. ಸೌಂದರ್ಯ ಸ್ಪರ್ಧೆಯ ವಿವಿಧ ಮಜಲುಗಳ್ನು ದಾಟಿ ಪರದಂಡ ಪ್ರಾರ್ಥನಾ ಪ್ರಥಮ ಸ್ಥಾನದೊಂದಿಗೆ ಮಿಸ್ ದಿವಾ ಆಫ್ ಇಂಡಿಯಾ- 2017 ಆಗಿ ಹೊರಹೊಮ್ಮಿದ್ದಾಳೆ. ಪ್ರಾರ್ಥನಾ ಕಳೆದ ಎರಡೂವರೆ ವರ್ಷದಿಂದ ಮಾಡಲಿಂಗ್‍ನಲ್ಲಿ ತೊಡಗಿಸಿಕೊಂಡಿದ್ದು, ಈ ಸಾಧನೆ ಮಾಡಿದ್ದಾಳೆ.

ಸೌಂದರ್ಯ ಸ್ಪರ್ಧೆಯಲ್ಲಿ ಈ ಹಿಂದೆಯೂ ಈಕೆ ಸಾಧನೆ ಮಾಡಿ ಗಮನ ಸೆಳೆದಿದ್ದಾಳೆ. ಅಲ್ಲದೆ ಮಡಿಕೇರಿಯ ‘ಗ್ರೀನ್ ಸಿಟಿ ಫೋರಂ’ ವತಿಯಿಂದ ಕಳೆದ ವರ್ಷ ಮಡಿಕೇರಿ ಸೇರಿದಂತೆ ವಿವಿಧೆಡೆ ಹಮ್ಮಿಕೊಳ್ಳಲಾಗಿದ್ದ ಸ್ವಚ್ಛತಾ ಆಂದೋಲನದ ಬ್ರ್ಯಾಂಡ್ ಅಂಬಾಸಿಡರ್ ಆಗಿಯೂ ಪ್ರಾರ್ಥನಾ ಕೊಡಗಿನವರಿಗೆ ಚಿರಪರಿಚಿತಳಾಗಿದ್ದಾಳೆ. ಈಕೆ ಪರದಂಡ ಮುದ್ದು ಸುಬ್ರಮಣಿ ಹಾಗೂ ಭವಾನಿ ದಂಪತಿಯ ಪುತ್ರಿ.