ಮಡಿಕೇರಿ, ಜ.12 : ಕೊಡವ ಕುಟುಂಬಗಳ ನಡುವಿನ ವಾರ್ಷಿಕ ಕ್ರಿಕೆಟ್ ಹಬ್ಬ ಮಡ್ಲಂಡ ಕ್ರಿಕೆಟ್ ಕಪ್-2018 ಏಪ್ರಿಲ್-ಮೇ ತಿಂಗಳಿನಲ್ಲಿ ಮಡಿಕೇರಿಯ ಫೀಲ್ಡ್ ಮಾರ್ಷಲ್ ಕೆ.ಎಂ.ಕಾರ್ಯಪ್ಪ ಕಾಲೇಜು ಮೈದಾನದಲ್ಲಿ ನಡೆಯಲಿದೆ. ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮಡ್ಲಂಡ ಕ್ರಿಕೆಟ್ ಕಪ್ ಸಮಿತಿಯ ಅಧ್ಯಕ್ಷ ಮಡ್ಲಂಡ ಮೋನಿಶ್ ಸುಬ್ಬಯ್ಯ, ಕಳೆದ 19 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಮಡಿಕೇರಿಯಲ್ಲಿ ಕೊಡವ ಕ್ರಿಕೆಟ್ ಕಪ್ ಪಂದ್ಯಾಟ ನಡೆಯುತ್ತಿರುವದು ವಿಶೇಷವೆಂದರು. ಈ ಬಾರಿ ಹೆಚ್ಚಿನ ತಂಡ ಹಾಗೂ ಅಭಿಮಾನಿಗಳನ್ನು ನಿರೀಕ್ಷಿಸಲಾಗಿದೆ. ಕೊಡವ ಹಾಕಿ ಹಬ್ಬದಂತೆ ಕೊಡವ ಕ್ರಿಕೆಟ್ ಹಬ್ಬ ಕೂಡ ಖ್ಯಾತಿ ಗಳಿಸಿದೆ. ಕಳೆದ 18 ವರ್ಷಗಳಿಂದ ಕೊಡವ ಕ್ರಿಕೆಟ್ ಅಕಾಡೆಮಿಯೊಂದಿಗೆ ಕ್ರಿಕೆಟ್ ಟೂರ್ನಿಯನ್ನು ಯಶಸ್ವಿಯಾಗಿ ಆಯೋಜಿಸಿದೆ. ಕ್ರಿಕೆಟ್ ಕಪ್ ಪಂದ್ಯಾವಳಿಯಿಂದಾಗಿ ಸಾಕಷ್ಟು ಎಳೆಯರು ಉತ್ತಮ ಆಟಗಾರರಾಗಿ ಹೊರ ಹೊಮ್ಮಿದ್ದಾರೆ.

(ಮೊದಲ ಪುಟದಿಂದ) ಈಗಾಗಲೇ ಶಾಲಾ, ಕಾಲೇಜು ಹಾಗೂ ಕ್ಲಬ್‍ಗಳಲ್ಲಿ ಉತ್ತಮ ಆಟಗಾರರಾಗಿ ಗುರುತಿಸಿಕೊಂಡಿದ್ದಾರೆ. ಮುಂದೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕೊಡಗಿನ ಯುವಕರು ಗಮನ ಸೆಳೆಯಬೇಕು ಎನ್ನುವದು ಪಂದ್ಯಾವಳಿಯ ಉದ್ದೇಶವಾಗಿದೆ ಎಂದು ಮೋನಿಶ್ ತಿಳಿಸಿದರು. ಈ ಬಾರಿ ಸುಮಾರು 250 ತಂಡಗಳನ್ನು ನಿರೀಕ್ಷಿಸಲಾಗಿದ್ದು, ಸುಮಾರು 20 ರಿಂದ 25 ಲಕ್ಷ ರೂ. ವೆಚ್ಚವಾಗಲಿದೆ ಎಂದರು.

ಕಳೆದ 18 ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಮಡ್ಲಂಡ ಕ್ರಿಕೆಟ್ ಕಪ್ ಪಂದ್ಯದಲ್ಲಿ ಮೂರನೇ ಅಂಪೈರ್ ಹಾಗೂ ರಿವ್ಯೂ ನಿಯಮವನ್ನು ಬ ಳಸಿಕೊಳ್ಳಲಾಗುತ್ತಿದೆ. ರನ್‍ಔಟ್ ಸಂದರ್ಭ ಆಗುವ ಗೊಂದಲ ಹಾಗೂ ವಿವಾದವನ್ನು ತಡೆಯುವ ಸಂದರ್ಭ ಈ ನಿಯಮವನ್ನು ಬಳಸಿಕೊಳ್ಳಬಹುದು. ಮೈದಾನದಲ್ಲಿನ ಅಂಪೈರ್ ನೀಡುವ ರನ್‍ಔಟ್ ತೀರ್ಪನ್ನು ತಂಡದ ನಾಯಕ ಪ್ರಶ್ನಿಸಬಹುದಾಗಿದೆ. ಈ ಸಂದರ್ಭ ಮೂರನೇ ಅಂಪೈರ್ ನೆರವು ಪಡೆದುಕೊಳ್ಳಲಾಗುವದು. ನಾಟ್‍ಔಟ್ ಎಂದು ಕಂಡು ಬಂದಲ್ಲಿ ರಿವ್ಯೂ ಅವಕಾಶ ತಂಡಕ್ಕೆ ಮುಂದುವರಿಯಲಿದೆ. ಎರಡು ಬಾರಿ ಔಟ್ ಎನ್ನುವದು ಕಂಡು ಬಂದಲ್ಲಿ ರಿವ್ಯೂ ಅವಕಾಶವನ್ನು ಆ ತಂಡ ಕಳೆದುಕೊಳ್ಳಲಿದೆ. ಈ ರೀತಿ ವಿಶೇಷ ಹಾಗೂ ವಿಭಿನ್ನವಾದ ಪ್ರಯತ್ನದ ಮೂಲಕ ಮಡ್ಲಂಡ ಕಪ್ ಗಮನ ಸೆಳೆಯಲಿದೆ ಎಂದರು.

ನಾಳೆ ಲಾಂಚನ ಬಿಡುಗಡೆ

ಮಡ್ಲಂಡ ಕ್ರಿಕೆಟ್ ಕಪ್-2018 ಲೋಗೋ ಹಾಗೂ ಬ್ರೋಷರ್ ಬಿಡುಗಡೆ ಸಮಾರಂಭ ತಾ. 14 ರಂದು ಅಪರಾಹ್ನ 2 ಗಂಟೆಗೆ ಮಡಿಕೇರಿ ಪತ್ರಿಕಾ ಭವನದಲ್ಲಿ ಜರುಗಲಿದೆ. ಕುಟುಂಬದ ಪಟ್ಟೆದಾರ ಎಂ.ಬಿ.ಪೊನ್ನಪ್ಪ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಲಿದ್ದಾರೆ. ವಿಧಾನ ಪರಿಷತ್ ಸದಸ್ಯೆ ಶಾಂತೆಯಂಡ ವೀಣಾ ಅಚ್ಚಯ್ಯ ಕಾರ್ಯಕ್ರಮ ಉದ್ಘಾಟಿಸುತ್ತಾರೆ. ಮಂಡೇಪಂಡ ಸುನಿಲ್ ಸುಬ್ರಮಣಿ ಬ್ರೋಷರ್ ಅನ್ನು ಹಾಗೂ ಸಮಾಜ ಸೇವಕ ಮೇರಿಯಂಡ ಸಂಕೇತ್ ಪೂವಯ್ಯ ಅವರು ಲಾಂಚನ ಅನಾವರಣಗೊಳಿಸಲಿದ್ದಾರೆ. ಕಾರ್ಯಕ್ರಮದಲ್ಲಿ ಕ್ರಿಕೆಟ್ ಕಪ್ ಅಧ್ಯಕ್ಷ ಮೋನಿಶ್ ಸುಬ್ಬಯ್ಯ, ಕೊಡವ ಕ್ರಿಕೆಟ್ ಅಕಾಡೆಮಿ ಅಧ್ಯಕ್ಷ ಕೀತಿಯಂಡ ಕಾರ್ಸನ್ ಕಾರ್ಯಪ್ಪ, ಕಾರ್ಯದರ್ಶಿ ಕುಂಡ್ರಂಡ ಬೋಪಣ್ಣ, ಪ್ರೆಸ್ ಕ್ಲಬ್ ಅಧ್ಯಕ್ಷ ಅಜ್ಜಮಾಡ ರಮೇಶ್ ಕುಟ್ಟಪ್ಪ ಮುಖ್ಯ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ ಎಂದು ಮೋನಿಶ್ ಮಾಹಿತಿ ನೀಡಿದರು.

ಮಡ್ಲಂಡÀ ಕುಟುಂಬದ ಬಗ್ಗೆ

ಮಡ್ಲಂಡ ಕುಟುಂಬ ಮಕ್ಕಂದೂರು ಹಾಗೂ ಮುಕ್ಕೋಡ್ಲುವಿನ ನಡುವೆ ಇರುವ ಮೇಘತ್ತಾಳು ಗ್ರಾಮಕ್ಕೆ ಸೇರಿದೆ. ಸುಮಾರು 300 ಎಕರೆ ಪ್ರದೇಶ ಕುಟುಂಬದ ಒಡೆತನದಲ್ಲಿದೆ. ಕುಟುಂಬದ ವಿಶೇಷ ಎಂದರೆ ಮಹಿಳೆಯರಿಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡಿರುವದು. ಹಾಲೇರಿ ರಾಜರ ಆಡಳಿತ ವ್ಯವಸ್ಥೆಯಲ್ಲಿ ನಮ್ಮ ಕುಟುಂಬದ ಕಾಮವ್ವ ಎಂಬ ವೀರ ವನಿತೆ ಸಕ್ರಿಯವಾಗಿ ಭಾಗವಹಿಸಿ ಗಮನ ಸೆಳೆದಿದ್ದರು. ಅಲ್ಲದೆ, ಕುಟುಂಬದ ಮೊದಲ ಪಟ್ಟೆದಾರರು ಕೂಡ ಪೊನ್ನವ್ವ ಎಂಬ ಮಹಿಳೆ. ಈಗಲೂ ಕೂಡ ಮಹಿಳೆಯರಿಗೆ ಸರಿಸಮಾನವಾದ ಸ್ಥಾನಮಾನ ನೀಡಲಾಗುತ್ತಿದೆ.

ಕುಟುಂಬದಲ್ಲಿ ಕಡಿಮೆ ಜನಸಂಖ್ಯೆಯಿದ್ದರೂ ಕ್ರಿಕೆಟ್ ಕಪ್ ಆಯೋಜಿಸುತ್ತಿರುವದು ಹೆಗ್ಗಳಿಕೆಯಾಗಿದೆ. ಕೇವಲ 20 ಕುಟುಂಬಗಳು ಹಾಗೂ 80 ಮಂದಿ ಸದಸ್ಯರು ಮಾತ್ರ ಕುಟುಂಬದಲ್ಲಿದ್ದಾರೆ. ಕುಟುಂಬದ ಪಟ್ಟೆದಾರರಾಗಿ ಎಂ.ಬಿ.ಪೊನ್ನಪ್ಪ, ಕ್ರಿಕೆಟ್ ಕಪ್‍ನ ಅಧ್ಯಕ್ಷರಾಗಿ ಮೋನಿಶ್ ಸುಬ್ಬಯ್ಯ, ಉಪಾಧ್ಯಕ್ಷರಾಗಿ ದರ್ಶನ್ (ಫೆಮ್ಮು), ಕಾರ್ಯದರ್ಶಿಯಾಗಿ ಗಗನ್ ನಾಣಯ್ಯ, ಜಂಟಿ ಕಾರ್ಯದರ್ಶಿಯಾಗಿ ದಿಲನ್ ಪೊನ್ನಣ್ಣ, ನಿರ್ದೇಶಕರಾಗಿ ಸುಬ್ಬಯ್ಯ, ತಿಮ್ಮಯ್ಯ, ತಮ್ಮಯ್ಯ, ಸೋಮಣ್ಣ, ಸಾಬು, ಮಾಚಯ್ಯ, ಪಳಂಗಪ್ಪ, ಲವ, ಗಣಪತಿ, ಪೂವಯ್ಯ, ಉತ್ತಪ್ಪ ಹಾಗೂ ನಾಣಯ್ಯ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಮೋನಿಶ್ ತಿಳಿಸಿದರು.

ಕ್ರಿಕೆಟ್ ಕಪ್ ಪಂದ್ಯಾವಳಿಯನ್ನು ವ್ಯವಸ್ಥಿತವಾಗಿ ನಡೆಸಲು ಮ್ಯಾನೇಜ್‍ಮೆಂಟ್ ಸಮಿತಿಯೊಂದನ್ನು ರಚಿಸಲಾಗಿದೆ. ಇದರ ಅಧ್ಯಕ್ಷರಾಗಿ ಮಡ್ಲಂಡ ಮೋನಿಶ್ ಸುಬ್ಬಯ್ಯ ಕಾರ್ಯನಿರ್ವಹಿಸುತ್ತಾರೆ. ಸಂಚಾಲಕರಾಗಿ ಬಾಳೆಯಡ ಪ್ರತೀಶ್ ಪೂವಯ್ಯ, ಸಲಹೆಗಾರರಾಗಿ ಐತಿಚಂಡ ರಮೇಶ್ ಉತ್ತಪ್ಪ, ಅಜ್ಜಮಾಡ ರಮೇಶ್ ಕುಟ್ಟಪ್ಪ, ವಿಶೇಷ ಸಂಚಿಕೆ ಸಲಹೆಗಾರರಾಗಿ ಅನಿಲ್ ಎಚ್.ಟಿ, ಖಜಾಂಚಿಯಾಗಿ ಬೊಳ್ಳಜಿರ ಬಿ. ಅಯ್ಯಪ್ಪ ಅವರನ್ನು ನೇಮಿಸಲಾಗಿದೆ ಎಂದು ಮೋನಿಶ್ ಸುಬ್ಬಯ್ಯ ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಕೊಡವ ಕ್ರಿಕೆಟ್ ಅಕಾಡೆಮಿಯ ಅಧ್ಯಕ್ಷ ಕೀತಿಯಂಡ ಕಾರ್ಸನ್ ಕಾರ್ಯಪ್ಪ, ಮಡ್ಲಂಡ ಕ್ರಿಕೆಟ್ ಕಪ್ ಸಮಿತಿಯ ಪ್ರಮುಖರಾದ ಮಡ್ಲಂಡ ತಿಮ್ಮಯ್ಯ, ಮಡ್ಲಂಡ ಲವ, ಮಡ್ಲಂಡ ಮಾಚಯ್ಯ ಹಾಗೂ ಮಡ್ಲಂಡ ಸುಜು ಸೋಮಯ್ಯ ಉಪಸ್ಥಿತರಿದ್ದರು.