ವೀರಾಜಪೇಟೆ, ಜ.20: ಅಜಾಗರೂಕತೆಯಿಂದ ವಾಹನ ಚಾಲನೆ ಮಾಡಿ ಅವಘಡ ಸಂಭವಿಸಿ ಬೈಕ್ ಸವಾರ ಗಂಭೀರ ಸ್ವರೂಪದ ಗಾಯಗೊಂಡಿರುವ ಘಟನೆ ಅಮ್ಮತಿ ಗ್ರಾಮದಲ್ಲಿ ಸಂಭವಿಸಿದೆ.

ಅಮ್ಮತಿ ಒಂಟಿಅಂಗಡಿಯ ಹೊಳೆಕಾಡು ತಿರುವಿನಲ್ಲಿ ಬೆಳಿಗ್ಗೆ 10-15 ಕ್ಕೆ ಅವಘಡ ಸಂಭವಿಸಿದೆ. ಪಾಲಿಬೆಟ್ಟ ಟಾಟಾ ಕಾಫಿ ಸಂಸ್ಥೆಯ ಉದ್ಯೋಗಿ ಪಿ.ಜಿ. ಮುರುಳಿ ಮೋಹನ್ ದಾಸ್ (48) ಕೆಲಸ ನಿಮಿತ್ತ ಮೂರ್ನಾಡು ಅರಣ್ಯ ಕಛೇರಿಗೆ ತಮ್ಮ ಬೈಕ್‍ನಲ್ಲಿ (ಕೆಎ-12-ಜೆ-7748) ತೆರಳುತ್ತಿದ್ದರು. ಎದುರಿನಿಂದ ಬಂದ ಎಸ್ ಎಕ್ಸ್4 ಮಾರುತಿ ಕಾರು (ಕೆಎ-12-ಪಿ-3015) ವೇಗವಾಗಿ ಬಂದು ಬೈಕ್‍ಗೆ ಅಪ್ಪಳಿಸಿದೆ. ಪರಿಣಾಮ ಬೈಕ್ ಸವಾರನ ಬಲಗಾಲಿನ ಮೂಳೆಯು ಮುರಿದಿದೆ. ಅಧಿಕವಾಗಿ ರಕ್ತ ಶ್ರಾವವಾಗಿ ಗಾಯಾಳು ಸ್ಥಳೀಯ ಆರ್.ಐ.ಹೆಚ್.ಪಿ. ಆಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ಬಳಿಕ ಹೆಚ್ಚಿನ ಚಿಕಿತ್ಸೆಗಾಗಿ ಮಂಗಳೂರಿನ ಆಸ್ಪತ್ರೆಯೊಂದರಲ್ಲಿ ದಾಖಲಾಗಿದ್ದಾರೆ. ಗಾಯಾಳು ಮುರುಳಿ ನೀಡಿದ ದೂರಿನ ಮೇರೆಗೆ ಕಾರು ಚಾಲಕನ ಮೇಲೆ ಪ್ರಕರಣ ದಾಖಲಿಸಿಕೊಂಡ ವೀರಾಜಪೇಟೆ ಗ್ರಾಮಾಂತರ ಪೊಲೀಸರು ಅವಘಡಕ್ಕೀಡಾದ ಕಾರು ಮತ್ತು ಬೈಕ್ ಅನ್ನು ವಶಪಡಿಸಿಕೊಂಡು ಮುಂದಿನ ಕ್ರಮ ಕ್ಯಗೊಂಡಿದ್ದಾರೆ.