ಸಿದ್ದಾಪುರ, ಜ. 20: ಚುನಾವಣೆ ಹತ್ತಿರವಾಗುತ್ತಿದ್ದಂತೆ ಜಿಲ್ಲೆಯಲ್ಲಿ ರಾಜಕೀಯ ಚಟುವಟಿಕೆಗಳು ಚುರುಕುಗೊಳ್ಳುತ್ತಿದೆ. ಪ್ರಮುಖ ಪಕ್ಷಗಳ ಮುಖಂಡರು ಈಗಾಗಲೇ ಒಂದು ಸುತ್ತಿನ ಕಾರ್ಯಕರ್ತರ ಸಭೆಯನ್ನು ಮುಗಿಸಿದ್ದು, ಜಿಲ್ಲೆಯಲ್ಲಿ ರಾಜಕೀಯ ಚುರುಕುಗೊಂಡಿದೆ.

ಈತನ್ಮದ್ಯೆ ಜೆ.ಡಿ.ಎಸ್ ಸಭೆಯಲ್ಲಿ ಬಿ.ಜೆ.ಪಿ ಶಾಸಕ ಕೆ.ಜಿ. ಬೋಪಯ್ಯ ಕಾಣಿಸಿಕೊಂಡಿದ್ದಾರೆ..! ಅಚ್ಚರಿಪಡ ಬೇಡಿ.. ಮರಗೋಡಿನ ವಿವೇಕಾನಂದ ಯುವ ಸಂಘದ ಸಭಾಂಗಣದಲ್ಲಿ ಜೆ.ಡಿ.ಎಸ್ ಕಾರ್ಯಕರ್ತರ ಸಭೆಯನ್ನು ಏರ್ಪಡಿಸಲಾಗಿತ್ತು. ಸಭೆಯಲ್ಲಿ ಜೆ.ಡಿ.ಎಸ್ ಜಿಲ್ಲಾಧ್ಯಕ್ಷ ಸಂಕೇತ್ ಪೂವಯ್ಯ, ಮಾಜಿ ಸಚಿವ ಬಿ.ಎ ಜೀವಿಜಯ ಸೇರಿದಂತೆ ಮುಖಂಡರು ಇದ್ದರು. ಈ ಸಂದರ್ಭ ಶಾಸಕ ಕೆ.ಜಿ ಬೋಪಯ್ಯ ಪರಿವರ್ತನಾ ರ್ಯಾಲಿಯ ಸಭೆಗೆ ಮರಗೋಡುವಿಗೆ ಆಗಮಿಸಿದ್ದು, ಬಿ.ಜೆ.ಪಿ.ಯ ಸಭೆ ನಡೆಯುತ್ತಿದ್ದ ಸಭಾಂಗಣವೆಂದು ಭಾವಿಸಿ ಜೆ.ಡಿ.ಎಸ್. ಸಭೆ ನಡೆಯುತ್ತಿದ್ದ ಸಭಾಂಗಣಕ್ಕೆ ಆಗಮಿಸಿದರು. ಸಭಾಂಗಣಕ್ಕೆ ಪ್ರವೇಶಿಸಿದ ಸಂದರ್ಭ ಸಂಕೇತ್ ಪೂವಯ್ಯ, ಜೀವಿಜಯ, ರಾಜಾರಾವ್ ಸೇರಿದಂತೆ ಜೆ.ಡಿ.ಎಸ್. ಮುಖಂಡರನ್ನು ಕಂಡ ಕೆ.ಜಿ. ಬೋಪಯ್ಯ ಗೊಂದಲಗೊಂಡರು. ಬಳಿಕ ವಿಷಯವನ್ನರಿತ ಶಾಸಕರು ಕೂಡಲೇ ಸಭಾಂಗಣದಿಂದ ಹೊರ ನಡೆದು ಬಳಿಕ ಬಿ.ಜೆ.ಪಿ. ಸಭೆಯಲ್ಲಿ ಪಾಲ್ಗೊಂಡರು. ಇತ್ತ ಶಾಸಕ ಕೆ.ಜಿ. ಬೋಪಯ್ಯ ಜೆ.ಡಿ.ಎಸ್. ಸಭೆಗೆ ಆಗಮಿಸಿದ್ದು, ಜೆ.ಡಿಎಸ್ ಕಾರ್ಯ ಕರ್ತರಿಗೂ ಅಚ್ಚರಿ ಮೂಡಿಸಿತ್ತು. ಒಂದು ಕ್ಷಣ ಕಾರ್ಯ ಕರ್ತರು ಕೂಡ ಗೊಂದಲದಲ್ಲೇ ಇದ್ದರು.