ಗೋಣಿಕೊಪ್ಪಲು, ಫೆ. 5: ಪತಿ - ಪತ್ನಿ ಇಬ್ಬರು ರಸ್ತೆ ದಾಟುತ್ತಿದ್ದ ವೇಳೆ ಪತ್ನಿ ಅಪಘಾತಕ್ಕೊಳಗಾಗಿ ಪತಿಯ ಕಣ್ಣೆದುರೇ ಸಾವನ್ನಪ್ಪಿರುವ ದಾರುಣ ಘಟನೆ ನಡೆದಿದೆ. ಪೊನ್ನಂಪೇಟೆ ಎಪಿಸಿಎಂಎಸ್ ಪೆಟ್ರೋಲ್ ಬಂಕ್ ಮುಂಭಾಗ ಮುಖ್ಯರಸ್ತೆಯಲ್ಲಿ ಘಟನೆ ನಡೆದಿದ್ದು, ದೇವಕಿ (45) ಎಂಬವರೇ ಮೃತ ದುರ್ದೈವಿ. ಮೃತ ಮಹಿಳೆ ತೂಚಮಕೇರಿಯ ನಿವಾಸಿಯಾಗಿದ್ದು, ಪೊನ್ನಂಪೇಟೆ ಪಟ್ಟಣಕ್ಕೆ ಆಗಮಿಸಿ ವಾಪಸ್ಸಾಗುವ ಸಂದರ್ಭ ಘಟನೆ ನಡೆದಿದ್ದು, ಗಂಡ ರಾಜುವಿನ ಎದುರೇ ಕೊನೆಯುಸಿರೆಳೆದಿದ್ದಾರೆ.ಪತಿ ಪತ್ನಿ ಒಟ್ಟಿಗೆ ರಸ್ತೆಯನ್ನು ದಾಟಿ ತಮ್ಮ ಕಡೆಗೆ ಹೋಗುವ ಖಾಸಗಿ ಬಸ್‍ಗೆ ಹತ್ತಬೇಕಾಗಿತ್ತು. ಬಸ್ಸು ಬಂದ ಕಾರಣ ರಾಜು ರಸ್ತೆಯನ್ನು ದಾಟಿ ಆಗಿತ್ತು. ರಾಜುವಿನ ಹಿಂದೆ ದೇವಕಿ ಆತುರದಲ್ಲಿ ರಸ್ತೆ ದಾಟುತ್ತಿದ್ದಂತೆಯೇ ಎಡಭಾಗದಿಂದ ಬಂದ ಮತ್ತೊಂದು ಖಾಸಗಿ ಬಸ್ಸಿನ ಮುಂದಿನ ಚಕ್ರಕ್ಕೆ ಸಿಲುಕಿದ್ದಾರೆ. ಪರಿಣಾಮ ತಲೆ ಮೇಲೆ ಮುಂದಿನ ಚಕ್ರ ಹರಿದು ಸ್ಥಳದಲ್ಲೇ ಪ್ರಾಣ ಬಿಟ್ಟಿದ್ದಾರೆ. ಮುಖ್ಯ ರಸ್ತೆಯಲ್ಲಿ ನಡೆದ ಘಟನೆಯಿಂದ ಕೆಲಕಾಲ ಸಂಚಾರ ವ್ಯವಸ್ಥೆ ಅಸ್ತವ್ಯಸ್ತವಾಗಿತ್ತು. ಸುದ್ದಿ ತಿಳಿದು ಸ್ಥಳಕ್ಕಾಗಮಿಸಿದ ಪೊನ್ನಂಪೇಟೆ ಠಾಣಾಧಿಕಾರಿ ಮಹೇಶ್ ಮೃತ ದೇಹವನ್ನು ಗೋಣಿಕೊಪ್ಪಲು ಸರ್ಕಾರಿ ಆಸ್ಪತ್ರೆಯ ಶವಾಗಾರಕ್ಕೆ ಸಾಗಿಸಿದರು. ಮೃತರು ಪತಿ ಹಾಗೂ ಎರಡು ಮಕ್ಕಳನ್ನು ಅಗಲಿದ್ದಾರೆ. -ಜಗದೀಶ್