ಗೋಣಿಕೊಪ್ಪ ವರದಿ, ಫೆ. 23: ಕಾವೇರಿ ಕಾಲೇಜು ಮೈದಾನದಲ್ಲಿ ಕಾವೇರಿ ವಿದ್ಯಾ ಸಂಸ್ಥೆ ಹಾಗೂ ಮಂಗಳೂರು ವಿಶ್ವ ವಿದ್ಯಾಲಯ ಸಹಯೋಗದಲ್ಲಿ ನಡೆದ 45 ನೇ ವರ್ಷದ ಚೆರಿಯಪಂಡ ಕುಶಾಲಪ್ಪ ಸ್ಮಾರಕ ಮಂಗಳೂರು ವಿಶ್ವ ವಿದ್ಯಾಲಯ ಅಂತರ್ ಕಾಲೇಜು ಹಾಕಿ ಕಪ್‍ನ್ನು ಮಡಿಕೇರಿ ಫೀಲ್ಡ್ ಮಾರ್ಷಲ್ ಕೆ. ಎಂ. ಕಾರ್ಯಪ್ಪ ತಂಡ ಗೆದ್ದುಕೊಂಡಿದೆ. ವೀರಾಜಪೇಟೆ ಕಾವೇರಿ ಕಾಲೇಜು ತಂಡ ರನ್ನರ್ ಅಪ್ ಸ್ಥಾನ ಅಲಂಕರಿಸಿದೆ.
ಫೈನಲ್‍ನಲ್ಲಿ ಮಡಿಕೇರಿ ತಂಡವು ಶೂಟೌಟ್‍ನಲ್ಲಿ ಗೆಲುವು ದಾಖಲಿಸಿತು. ಮಡಿಕೇರಿ ತಂಡವು ಶೂಟೌಟ್‍ನಲ್ಲಿ 3-1 ಗೋಲುಗಳ ಗೆಲುವು ದಾಖಲಿಸಿ ಚಾಂಪಿಯನ್ ಆಗಿ ಹೊರ ಹೊಮ್ಮಿತು. ಉಭಯ ತಂಡಗಳು 1-1 ಗೋಲುಗಳ ಸಮನಾಂತರ ಸಾಧಿಸಿತ್ತು. 5ನೇ ನಿಮಿಷದಲ್ಲಿ ಮಡಿಕೇರಿ ಪರ ಜೋಯಪ್ಪ, 50 ನೇ ನಿಮಿಷದಲ್ಲಿ ವೀರಾಜಪೇಟೆ ಪರ ಪ್ರಜ್ವಲ್ ಗೋಲು ಹೊಡೆದರು. ಟೈಬ್ರೇಕರ್‍ನಲ್ಲಿ ಮಡಿಕೇರಿ ಪರವಾಗಿ ಜೋಯಪ್ಪ ಹಾಗೂ ಪ್ರಸನ್ನ ತಲಾ ಒಂದೊಂದು ಗೋಲು ಹೊಡೆದು ಟೈಬ್ರೇಕರ್‍ನಲ್ಲಿ ಗೆಲುವಿಗೆ ಕಾರಣರಾದರು.
ಸೆಮಿ ಫೈನಲ್‍ನಲ್ಲಿ ಗೋಣಿಕೊಪ್ಪ ಕಾವೇರಿ ಕಾಲೇಜು ಹಾಗೂ ವೀರಾಜಪೇಟೆ ಕಾವೇರಿ ಕಾಲೇಜು ತಂಡಗಳ ನಡುವಿನ ಪಂದ್ಯ ರೋಚಕ ಆಟಕ್ಕೆ ಸಾಕ್ಷಿಯಾಯಿತು. ವೀರಾಜಪೇಟೆ ಕಾವೇರಿ ಕಾಲೇಜು ತಂಡವು ಪೆನಾಲ್ಟಿ ಶೂಟೌಟ್‍ನಲ್ಲಿ 2-1 ಗೋಲುಗಳಿಂದ ಜಯ ಸಾಧಿಸಿತು. ಎರಡನೇ ಸೆಮಿಯಲ್ಲಿ ಮಡಿಕೇರಿ ಎಫ್‍ಎಂಸಿ ತಂಡವು ಮಂಗಳೂರು ಸೆಂಟ್ ಅಲೋಸಿಯೆಸ್ ವಿರುದ್ದ ಶೂಟೌಟ್‍ನಲ್ಲಿ 4-2 ಗೋಲುಗಳಿಂದ ಜಯ ಸಾಧಿಸಿತು.
ಪ್ರಥ್ವಿ ಸರಣಿ ಶ್ರೇಷ್ಠ : ಮಡಿಕೇರಿ ಫೀಲ್ಡ್ ಮಾರ್ಷಲ್ ಕೆ. ಎಂ. ಕಾರ್ಯಪ್ಪ ತಂಡದ ಗೋಲ್ ಕೀಪರ್ ಪ್ರಥ್ವಿ ಸರಣಿ ಶ್ರೇಷ್ಠ ಪ್ರಶಸ್ತಿ ಪಡೆದುಕೊಂಡರು. ಉತ್ತಮ ಗೋಲ್ ಕೀಪರ್ ಪ್ರಶಸ್ತಿಯನ್ನು ಗೋಣಿಕೊಪ್ಪ ಕಾವೇರಿ ಕಾಲೇಜು ತಂಡದ ವಿಶಾಲ್ ಮೊಣ್ಣಪ್ಪ, ಬೆಸ್ಟ್ ಆಫ್ ಪ್ರಶಸ್ತಿಯನ್ನು ಎಫ್‍ಎಂಸಿ ತಂಡದ ಕರಣ್ ಉತ್ತಪ್ಪ, ಬೆಸ್ಟ್ ಫಾರ್ವರ್ಡ್ ಪ್ರಶಸ್ತಿಯನ್ನು ವಿರಾಜಪೇಟೆ ಕಾವೇರಿ ಕಾಲೇಜು ತಂಡದ ಬೋಪಣ್ಣ, ಬೆಸ್ಟ್ ಸೆಂಟರ್ ಆಫ್ ಆಗಿ ಗೋಣಿಕೊಪ್ಪ ಕಾವೇರಿ ಕಾಲೇಜು ತಂಡದ ಜತನ್, ಬೆಸ್ಟ್ ಆಫ್ ಆಗಿ ವೀರಾಜಪೇಟೆ ಕಾವೆರಿ ಕಾಲೇಜು ತಂಡದ ಸುಖನ್, ಹೀರೋ ಆಫ್ ದ ಮ್ಯಾಚ್ ಪ್ರಶಸ್ತಿಯನ್ನು ಎಫ್‍ಎಂಸಿ ತಂಡ ಸುದೀಶ್, ಭವಿಷ್ಯದ ಆಟಗಾರನಾಗಿ ಗೋಣಿಕೊಪ್ಪ ಕಾವೇರಿ ಕಾಲೇಜು ತಂಡದ ಸೋಮಣ್ಣ, ಟೂರ್ನಿಯಲ್ಲಿ ಹೆಚ್ಚು ಗೋಲು ಬಾರಿಸಿದ (2 ಗೋಲು) ಮಂಗಳೂರು ಸೆಂಟ್ ಅಲೋಸಿಯೆಸ್ ತಂಡದ ಆಟಗಾರ ಗಣಪತಿ ಬೆಸ್ಟ್ ಸ್ಕೋರರ್ ಪ್ರಶಸ್ತಿ ಪಡೆದುಕೊಂಡರು.
ಟೂರ್ನಿಯಲ್ಲಿ ಎಫ್‍ಜಿಸಿ ಮೂರ್ನಾಡು, ಮಂಗಳೂರು ಅಲೋಷಿಯೆಸ್, ಜಿಎಫ್‍ಜಿಸಿ ಶನಿವಾರಸಂತೆ, ಪೊನ್ನಂಪೇಟೆ ಸಾಯಿ ಶಂಕರ್, ಮಂಗಳೂರು ಎಂಯು ಕ್ಯಾಂಪಸ್, ಎಫ್‍ಎಂಕೆಸಿ, ವೀರಾಜಪೇಟೆ ಸೆಂಟ್ ಆನ್ಸ್, ವೀರಾಜಪೇಟೆ ಕಾವೇರಿ ಕಾಲೇಜು, ವೀರಾಜಪೇಟೆ ಜಿಎಫ್‍ಜಿಸಿ, ಸೋಮವಾರಪೇಟೆ ಸೆಂಟ್ ಜೋಸೆಫ್, ಪುತ್ತೂರು ಸೆಂಟ್ ಫಿಲೋಮಿನಾಸ್, ಗೋಣಿಕೊಪ್ಪ ಕಾವೇರಿ ಕಾಲೇಜು ಪಾಲ್ಗೊಂಡವು.
ದಾನಿ ಚಿರಿಯಪಂಡ ರಾಕೇಶ್ ಪೂವಯ್ಯ, ಜಮ್ಮಡ ಜೋಯಪ್ಪ, ಮಂಗಳೂರು ವಿಶ್ವವಿದ್ಯಾನಿಲಯದ ದೈಹಿಕ ಶಿಕ್ಷಣ ವಿಭಾಗದ ಉಪನಿದೇರ್ಶಕ ಡಾ. ಹೆಚ್. ಎನ್. ರಮೇಶ್, ಪ್ರಾಂಶುಪಾಲ ಪ್ರೊ. ಪಟ್ಟಡ ಪೂವಣ್ಣ, ವೀರಾಜಪೇಟೆ ಕಾವೇರಿ ಕಾಲೇಜು ಪ್ರಾಂಶುಪಾಲ ಸಿ. ಎಂ. ನಾಚಪ್ಪ, ಹಿರಿಯ ಉಪನ್ಯಾಸಕ ಮಾಳೇಟೀರ ಕಾವೇರಪ್ಪ, ದೈಹಿಕ ಶಿಕ್ಷಕ ಎಂ. ಟಿ. ಸಂತೋಷ್, ತರಬೇತುದಾರ ಮಿನ್ನಂಡ ಜೋಯಪ್ಪ ಬಹುಮಾನ ವಿತರಿಸಿದರು.
ಪವಿತ್ರಾ ಸ್ವಾಗತಿಸಿದರು. ಎಂ. ಟಿ ಸಂತೋಷ್ ಟೂರ್ನಿ ವರದಿ ವಾಚಿಸಿದರು. ಚೋಯಮಾಡಂಡ ಚೆಂಗಪ್ಪ, ಕುಪ್ಪಂಡ ದಿಲನ್ ತೀರ್ಪುಗಾರರಾಗಿ ಕಾರ್ಯ ನಿರ್ವಹಿಸಿದರು. ಅಜ್ಜಮಾಡ ಚೆಂಗಪ್ಪ ಮತ್ತು ಮುದ್ದಪ್ಪ ವೀಕ್ಷಕ ವಿವರಣೆ ನೀಡಿದರು. ವಿಜೇತ ತಂಡಗಳಿಗೆ ರೋಲಿಂಗ್ ಟ್ರೋಫಿ ಹಾಗೂ ಶಾಶ್ವತ ಟ್ರೋಫಿ ನೀಡಿ ಗೌರವಿಸಲಾಯಿತು.
ವರದಿ : ಸುದ್ದಿಪುತ್ರ