ಕೂಡಿಗೆ, ಏ. 14: ಕುಡಿದ ಅಮಲಿನಲ್ಲಿ ಪರಸ್ಪರ ಹೊಡೆದಾಡಿಕೊಂಡಿದ್ದು, ಈ ವೇಳೆ ಗಾಯಗೊಂಡಿದ್ದ ಮಹಿಳೆಯು ಮರು ದಿವಸ ಸಾವನ್ನಪ್ಪಿದ ಸಂಬಂಧ ಕುಶಾಲನಗರ ಗ್ರಾಮಾಂತರ ಠಾಣಾ ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ.

ಶಿರಂಗಾಲ ಗ್ರಾಮದ ಅಕ್ಕಮ್ಮ ಎಂಬಾಕೆ ತಾ. 12 ರಂದು ಸಂಜೆ ಎದುರು ಮನೆಯ ಆಶಾ, ರೇಷ್ಮ, ನಾಗೇಶ ಎಂಬವರೊಂದಿಗೆ ನಡೆದ ಹೊಡೆದಾಟದಿಂದ ತಲೆಗೆ ಪೆಟ್ಟಾಗಿ ಗಾಯಗೊಂಡಿದ್ದಾಳೆ. ತಾ. 13 ರಂದು ಆಕೆ ಸಾವನ್ನಪ್ಪಿದ್ದಾಳೆ. ಈ ಬಗ್ಗೆ ಮೃತಳ ಮಗ ರಘು ಕುಶಾಲನಗರ ಗ್ರಾಮಾಂತರ ಠಾಣೆಗೆ ದೂರು ನೀಡಿ, ತಾಯಿಯ ಸಾವಿಗೆ ಮೇಲಿನ ಮೂವರು ಆರೋಪಿಗಳು ಕಾರಣರೆಂದು ಆರೋಪಿಸಿದ್ದಾರೆ.

ಆ ಮೇರೆಗೆ ಮಹಜರು ನಡೆಸಿ, ಮೃತಳ ಶವ ಮರಣೋತ್ತರ ಪರೀಕ್ಷೆಯೊಂದಿಗೆ ಬಂಧುಗಳಿಗೆ ಒಪ್ಪಿಸಿರುವ ಪೊಲೀಸರು, ಆರೋಪಿಗಳ ವಿರುದ್ಧ ಕಾನೂನು ಕ್ರಮ ಜರುಗಿಸಿದ್ದಾರೆ.