ಕುಶಾಲನಗರ, ಏ. 22: ಕುಶಾಲನಗರ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿ ಮತಯಂತ್ರ ಹಾಗೂ ಮತದಾನದ ಬಗ್ಗೆ ಪ್ರಾತ್ಯಕ್ಷಿಕೆ ನಡೆಸುವ ಮೂಲಕ ಮತದಾರರಲ್ಲಿ ಜಾಗೃತಿ ಮೂಡಿಸುವ ಕಾರ್ಯಕ್ರಮ ನಡೆಯಿತು.

ಕುಶಾಲನಗರ ಪಟ್ಟಣ ಪಂಚಾಯಿತಿ ಮತ್ತು ಚುನಾವಣಾ ಆಯೋಗ ಜಂಟಿಯಾಗಿ ಪಟ್ಟಣದ ದಂಡಿನಪೇಟೆಯ ಮತಗಟ್ಟೆ ಸಂಖ್ಯೆ 165, 166 ಮತ್ತು ಟೌನ್ ಕಾಲೋನಿ 167 ರ ಮೂರು ಮತಗಟ್ಟೆ ಕೇಂದ್ರಗಳ ಮತದಾರರಿಗೆ ಮತದಾನ ಮಾಡುವ ಬಗ್ಗೆ ಅಧಿಕಾರಿಗಳು ಮಾಹಿತಿ ಒದಗಿಸಿದರು.

ಮತಯಂತ್ರದಲ್ಲಿ ಅಭ್ಯರ್ಥಿಗಳ ಆಯ್ಕೆ, ನೋಟಾ ಬಳಕೆ ಸೇರಿದಂತೆ ವಿವಿಪ್ಯಾಡ್ ಯಂತ್ರದ ಕಾರ್ಯನಿರ್ವಹಣೆ ಬಗ್ಗೆ ಸಾರ್ವಜನಿಕರಿಗೆ ಮಾಹಿತಿ ನೀಡಲಾಯಿತು. ಚುನಾವಣಾ ಸಿಬ್ಬಂದಿಗಳಾದ ಅಪ್ಪಣ್ಣ, ಡಿ.ಡಿ. ಪೆಮ್ಮಯ್ಯ, ದಂಡಿನಪೇಟೆ ಬೂತ್ ಮಟ್ಟದ ಅಧಿಕಾರಿ ಇಕ್ಬಾಲ್ ಹುಸೇನ್, ಪಟ್ಟಣ ಪಂಚಾಯಿತಿ ಕಂದಾಯಧಿಕಾರಿ ಸದಾಶಿವಮೂರ್ತಿ, ಸಿಬ್ಬಂದಿಗಳಾದ ಧನಂಜಯ, ನಂಜುಂಡ ಇದ್ದರು.