ಶನಿವಾರಸಂತೆ, ಏ. 22: ಹೋಬಳಿಯಾದ್ಯಂತ ಭಾನುವಾರ ಮಧ್ಯಾಹ್ನ 2.45 ರಿಂದು 4ರವರೆಗೆ ಗುಡುಗು, ಮಿಂಚು, ಬಿರುಗಾಳಿ ಸಹಿತ ಧಾರಾಕಾರ ಮಳೆ ಸುರಿಯಿತು. ರಸ್ತೆಗಳು ಚರಂಡಿಯಲ್ಲಿ ನೀರು ತುಂಬಿ ಹರಿಯಿತು ಒಂದು ಇಂಚು ಮಳೆಯಾಗಿದೆ.

ಬೀಸಿದ ಭಾರೀ ಬಿರುಗಾಳಿಗೆ ಅಲ್ಲಲ್ಲಿ ಹಾನಿಗಳಾಗಿವೆ. ಪಟ್ಟಣದ ಕಾನ್ವೆಂಟ್ ರಸ್ತೆಯಲ್ಲಿರುವ ಸುಶೀಲಾ ಹೋಂ ಇಂಡಸ್ಟ್ರೀಸ್ ಕಟ್ಟಡದ ರೂ. 20 ಸಾವಿರ ಮೌಲ್ಯದ 24 ಶೀಟುಗಳು ಗಾಳಿಗೆ ಹಾರಿ ನೆಲಕಚ್ಚಿ ಚೂರಾಗಿವೆ. ರೂ. 10 ಸಾವಿರ ಮೌಲ್ಯದ 3 ಸಾವಿರ ಅಡಿಕೆ ಹಾಳೆ, ರೂ. 10 ಸಾವಿರ ಮೌಲ್ಯದ 4 ಸಾವಿರ ತಟ್ಟೆಗಳು ಹಾರಿ ಹೋಗಿ ನಷ್ಟವಾಗಿವೆ. ವಿದ್ಯುತ್ ಸಂಪರ್ಕ ಕಡಿತಗೊಂಡಿದೆ. ಮಳೆ ಶುರುವಾಗಿ ಬಿರುಗಾಳಿ ಬೀಸಲಾರಂಭಿಸು ತ್ತಿದ್ದಂತೆ ಭಯಭೀತರಾದ ಮಾಲೀಕರಾದ ಸುಶೀಲಾ, ಪುತ್ರ ಶಮಂತ್, ಐವರು ಮಹಿಳಾ ಕಾರ್ಮಿಕರೊಂದಿಗೆ ಹೊರಗೆ ಓಡಿ ಬಂದಿದ್ದು, ಅಪಾಯದಿಂದ ಪಾರಾಗಿರುವದಾಗಿ ಸುಶೀಲಾ ತಿಳಿಸಿದ್ದಾರೆ.

ಮಳೆ - ಗಾಳಿ ರಭಸಕ್ಕೆ ಸೆಕ್ರೇಡ್ ಹಾರ್ಟ್ ಕಾನ್ವೆಂಟ್ ಆವರಣದ 15 ಅಡಿ ತಡೆಗೋಡೆ ಕುಸಿದು ಬಿದ್ದಿದೆ. ಸಮೀಪದ ನಿಡ್ತ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಬಿಸಿಎಂ ಹಾಸ್ಟೆಲ್ ಬಳಿ ಮೋರಿಗಳಿಲ್ಲದ ಕಾರಣ ಹರಿದು ಬಂದ ಮಳೆ ನೀರು ರಸ್ತೆಯಲ್ಲೇ ಹಳ್ಳವಾಗಿ ನಿಂತು ದನಕರುಗಳಿಗೆ, ಪಾದಚಾರಿಗಳಿಗೆ ವಾಹನ ಸಂಚಾರಕ್ಕೆ ಅಡಚಣೆಯಾಯಿತು. ಸಂಜೆ ನಾಲ್ಕರ ನಂತರ ಮಳೆಯ ರಭಸ ಕಡಿಮೆಯಾಗಿ ಸಣ್ಣಗೆ ಜಿನುಗತೊಡಗಿತು. ಗುಡುಗಿನ ಆರ್ಭಟ ಮುಂದುವರೆದಿತ್ತು. ಸಮೀಪದ ಕೊಡ್ಲಿಪೇಟೆ ಹೋಬಳಿಯಲ್ಲೂ ಗುಡುಗು, ಮಿಂಚು, ಬಿರುಗಾಳಿ ಸಹಿತ ಭಾರೀ ಮಳೆಯಾಗಿದೆ.