ಸೋಮವಾರಪೇಟೆ, ಏ.23: ಸಂತೆ ದಿನವಾದ ಸೋಮವಾರ ಸಂಜೆ ಉಂಟಾದ ವಾಯು ವರುಣನಾರ್ಭಟಕ್ಕೆ ಸೋಮವಾರಪೇಟೆಯ ಸಂತೆ ಮಳೆ ನೀರಿನಲ್ಲಿ ಕೊಚ್ಚಿ ಹೋಯಿತು. ಸಂಜೆ ವೇಳೆಗೆ ಬಂದ ಭಾರೀ ಮಳೆಯೊಂದಿಗೆ ರಭಸದ ಗಾಳಿ ಬೀಸಿದ ಪರಿಣಾಮ ವ್ಯಾಪಾರಸ್ಥರು ಕಟ್ಟಿಕೊಂಡಿದ್ದ ಟಾರ್ಪಲ್‍ಗಳು ಹಾರಿಹೋದವು. ಭಾರೀ ಮಳೆಗೆ ಹೈಟೆಕ್ ಮಾರುಕಟ್ಟೆಯ ಛಾವಣಿಯಿಂದಲೂ ನೀರು ಸೋರಿಕೆಯಾದ ಪರಿಣಾಮ ಮಾರುಕಟ್ಟೆಯ ಒಳಾಂಗಣವೂ ಒದ್ದೆಯಾಯಿತು. ಸುಮಾರು ಒಂದು ಗಂಟೆಗಳ ಕಾಲ ಸುರಿದ ಭಾರೀ ಮಳೆಯಿಂದ ವ್ಯಾಪಾರಸ್ಥರು ಮತ್ತು ಸಾರ್ವಜನಿಕ ಗ್ರಾಹಕರು ಸಂತೆಯೊಳಗೆ ಪರದಾಡಿದರು. ಮಾರುಕಟ್ಟೆಯ ಹೊರಭಾಗ ಟಾರ್ಪಲ್ ಕಟ್ಟಿಕೊಂಡು ವ್ಯಾಪಾರ ವಹಿವಾಟು ನಡೆಸುತ್ತಿದ್ದವರು ಮಳೆಯಿಂದಾಗಿ ಹೆಚ್ಚಿನ ಸಂಕಷ್ಟಕ್ಕೆ ಒಳಗಾದರು.