ಸುಂಟಿಕೊಪ್ಪ, ಏ. 24: ಕ್ಷುಲ್ಲಕ ಕಾರಣಕ್ಕೆ ಕಲಹ ನಡೆದು ವ್ಯಕಿಯೊರ್ವ ಮೂವರಿಗೆ ಚಾಕುವಿನಿಂದ ಇರಿದು ಗಾಯಗೊಳಿಸಿ ಪರಾರಿಯಾದ ಘಟನೆ ಸಮೀಪದ ಮಾರುತಿ ನಗರದಲ್ಲಿ ನಡೆದಿದೆ.

ಕುಶಾಲನಗರ ಸಮೀಪದ ಕಡುವಿನ ಹೊಸಹಳ್ಳಿ ನಿವಾಸಿಯಾಗಿದ್ದು, ಇತ್ತಿಚಿನ ಕೆಲವು ತಿಂಗಳುಗಳಿಂದ ಸುಂಟಿಕೊಪ್ಪ ಸಮೀಪದ ಮಾರುತಿನಗರದ ಜಾಜಯ್ಯ ಅವರ ಮನೆಯಲ್ಲಿ ವಾಸವಿರುವ ಪಾರ್ವತಿ ಅವರ ಪುತ್ರ ಪುಟ್ನಂಜ ಎಂಬಾತನೇ ಚೂರಿಯಿಂದ ಇರಿದ ಆರೋಪಿಯಾಗಿದ್ದಾನೆ.

ಕೆಲವು ದಿನಗಳಿಂದ ಪುಟ್ನಂಜ ಮತ್ತು ಕುಮಾರ ಎಂಬಾತನ ನಡುವೆ ಆಗಾಗ್ಗೆ ಕ್ಷುಲ್ಲಕ ಕಾರಣಕ್ಕೆ ಕಲಹವೇರ್ಪಡುತ್ತಿತ್ತು ಎನ್ನಲಾಗಿದೆ. ಆ ಕಲಹ ಭಾನುವಾರ ರಾತ್ರಿಯು ನಡೆದು ಕೋಪಗೊಂಡ ಕುಮಾರ ಸುಂಟಿಕೊಪ್ಪ ಪಟ್ಟಣಕ್ಕೆ ಆಗಮಿಸಿ ತನ್ನ ಸ್ನೇಹಿತರಾದ ಸತೀಶ್ ಪೂಜಾರಿ ಮತ್ತು ಸತೀಶ್ ಎಂಬವರನ್ನು ಕರೆದುಕೊಂಡು ಮಾರುತಿ ನಗರಕ್ಕೆ ತೆರಳಿ ಪುಟ್ನಂಜನೊಡನೆ ಜಗಳಕ್ಕೆ ಮುಂದಾಗಿದ್ದಾನೆ ಎನ್ನಲಾಗಿದೆ. ಕುಪಿತಗೊಂಡ ಪುಟ್ನಂಜ ತನ್ನ ಬಳಿಯಲ್ಲಿದ್ದ ಚಾಕುವಿನಿಂದ ಕುಮಾರನ ಕೈ,ಮುಖದ ಭಾಗಕ್ಕೆ ಇರಿದಿದ್ದಾನೆ. ತಡೆಯಲು ಹೋದ ಕುಮಾರನ ಗೆಳೆಯರಾದ ಟಿಸಿಎಲ್ ತೋಟದ ನಿವಾಸಿ ಸತೀಶ್ ಪೂಜಾರಿಗೆ ಹೊಟ್ಟೆಭಾಗಕ್ಕೆ ಮತ್ತು ಸುಂಟಿಕೊಪ್ಪ ಒಂದನೇ ವಿಭಾಗದ ನಿವಾಸಿ ಪೈಂಟರ್ ಸತೀಶ್ ಎಂಬಾತನಿಗೆ ಗುಪ್ತಾಂಗಕ್ಕೆ ಚಾಕುವಿನಿಂದ ಇರಿದು ಅಲ್ಲಿಂದ ಪರಾರಿಯಾಗಿದ್ದಾನೆ.

ವಿಷಯವರಿತ ಸುಂಟಿಕೊಪ್ಪ ಪಿಎಸ್‍ಐ ಮತ್ತು ಸಿಬ್ಬಂದಿಗಳು ಸ್ಥಳಕ್ಕೆ ಆಗಮಿಸಿ ಮಹಜರು ನಡೆಸಿ ಪರಾರಿಯಾಗಿರುವ ಆರೋಪಿ ಪುಟ್ನಂಜ ನ ವಿರುದ್ಧ ಕೊಲೆ ಪ್ರಯತ್ನದ ಆರೋಪದಡಿ ಮೊಕದ್ದಮೆ ದಾಖಲಿಸಿ ಕೊಂಡಿದ್ದು, ಆರೋಪಿಯ ಪತ್ತೆಗೆ ಬಲೆ ಬೀಸಿದ್ದಾರೆ.

ಆರೋಪಿಯ ಕುರುಹು ಸಿಕ್ಕಲ್ಲಿ ಸುಂಟಿಕೊಪ್ಪ ಪೊಲೀಸ್ ಠಾಣೆಯ ದೂರವಾಣಿ ಸಂಖ್ಯೆ 08276-262333 ಗೆ ಮಾಹಿತಿ ನೀಡುವಂತೆ ಜಯರಾಂ ಮನವಿ ಮಾಡಿಕೊಂಡಿದ್ದಾರೆ.