ಶನಿವಾರಸಂತೆ, ಏ. 25: ಸಮೀಪದ ಗೋಪಾಲಪುರ ಗ್ರಾಮದ ಸಂತ ಅಂಥೋಣಿ ಚರ್ಚ್‍ನ ವಾರ್ಷಿಕೋತ್ಸವ ಸಮಾರಂಭ ಮಂಗಳವಾರ ರಾತ್ರಿ ವಿಜೃಂಭಣೆಯಿಂದ ಜರುಗಿತು.ಚರ್ಚ್‍ನ ಸಭಾಂಗಣದಲ್ಲಿ ಫಾದರ್ ಡೇವಿಡ್ ಸಗಾಯ್ ರಾಜ್ ನೇತೃತ್ವದಲ್ಲಿ ಕೊಡಗು, ಹಾಸನ ಹಾಗೂ ಮೈಸೂರು ಪ್ರಾಂತ್ಯದ ವಿವಿಧ ಚರ್ಚ್‍ಗಳ ಫಾದರ್‍ಗಳು ಗಾಯನ ಬಲಿ ಪೂಜೆ ನೆರವೇರಿಸಿದರು.

ನಂತರ ಗ್ರಾಮದ ಮುಖ್ಯರಸ್ತೆಯಲ್ಲಿ ಏಸುಕ್ರಿಸ್ತ ಹಾಗೂ ಸಂತ ಅಂಥೋಣಿ ಮೂರ್ತಿಗಳ ತೇರುಗಳ ಮೆರವಣಿಗೆ ನಡೆಯಿತು. ಕೇರಳ ವಯನಾಡಿನ ಶ್ರುತಿ ಲಯಂ ಸುಲ್ತಾನ್ ಬತ್ತೇರಿ ಅವರ ಚಂಡೆಮೇಳದೊಂದಿಗೆ ಕ್ರೈಸ್ತ ಸಮುದಾಯದವರು ಕೈಯಲ್ಲಿ ಮೊಂಬತ್ತಿ ಹಿಡಿದು ಮೆರವಣಿಗೆಯಲ್ಲಿ ಪಾಲ್ಗೊಂಡಿದ್ದರು.

ಗೋಪಾಲಪುರ, ಒಡೆಯನಪುರ, ಶನಿವಾರಸಂತೆ, ಕೊಡ್ಲಿಪೇಟೆ, ನಂದಿಗುಂದ, ಬೀಟಿಕಟ್ಟೆ ಇತ್ಯಾದಿ ಊರುಗಳಿಂದ ಬಂದಿದ್ದ ಕ್ರೈಸ್ತ ಸಮುದಾಯದವರು ವಿಶೇಷ ಪ್ರಾರ್ಥನೆ, ಪೂಜಾ ಕಾರ್ಯಕ್ರಮಗಳು ಹಾಗೂ ಸಾಮೂಹಿಕ ಭೋಜನ ಕಾರ್ಯಕ್ರಮಗಳಲ್ಲಿ ಶ್ರದ್ಧಾ ಭಕ್ತಿಯಿಂದ ಪಾಲ್ಗೊಂಡಿದ್ದರು.