ಸಿದ್ದಾಪುರ, ಜೂ. 15: ಮಹಿಳೆಯೋರ್ವಳ ಕತ್ತಿನಿಂದ ಚಿನ್ನದ ಸರವನ್ನು ಅಪಹರಣ ಮಾಡಿ ತಲೆಮರೆಸಿಕೊಂಡಿದ್ದ ಪ್ರಮುಖ ಆರೋಪಿಯನ್ನು ಬಂಧಿಸುವಲ್ಲಿ ಸಿದ್ದಾಪುರ ಪೊಲೀಸರು ಯಶಸ್ವಿಯಾಗಿದ್ದಾರೆ.

ಕಳೆದ 6 ತಿಂಗಳ ಹಿಂದೆ ನೆಲ್ಯಹುದಿಕೇರಿ ಗ್ರಾಮದ ಬೆಟ್ಟದ ಕಾಡುವಿನ ನಿವಾಸಿ ಕೆ.ಎಲ್. ಬಿಜೇಶ್ (30) ಎಂಬಾತ ತನ್ನ ಸ್ನೇಹಿತನೊಂದಿಗೆ ಸೇರಿ ಗುಹ್ಯ ಗ್ರಾಮದ ಕೂಡುಗದ್ದೆಗೆ ಬೈಕ್‍ನಲ್ಲಿ ತೆರಳಿದ್ದ. ಕೂಡುಗದ್ದೆಯ ನಿವಾಸಿಯಾಗಿರುವ ಸಂಧ್ಯಾ ಎಂಬವರ ಮನೆಗೆ ಆಗಮಿಸಿ ನಿಮಗೆ ಕೊರಿಯರ್ ಬಂದಿದ್ದೆ ಎಂದು ಹೇಳಿ ಮನೆಯೊಳಗಿನಿಂದ ಕರೆದಾಗ ಸಂಧ್ಯಾ ಕೋರಿಯರ್ ಬಂದಿದೆ ಎಂದು ನಂಬಿ ಕೋಣೆಯಿಂದ ಬರುವ ಸಂದರ್ಭದಲ್ಲಿ ಬಿಜೇಶ್ ಸಂಧ್ಯಾರವರ ಕೊರಳಿನಲ್ಲಿದ್ದ ಚಿನ್ನದ ಸರವನ್ನು ಎಳೆದು ಅಪಹರಣ ಮಾಡಿ ಬೈಕ್‍ನಲ್ಲೇ ಪರಾರಿಯಾಗಿದ್ದರು.

ಈ ಬಗ್ಗೆ ಸಿದ್ದಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು. ಪ್ರಕರಣಕ್ಕೆ ಸಂಬಂಧಿಸಿದಂತೆ ಈ ಹಿಂದೆ ಓರ್ವ ಆರೋಪಿಯನ್ನು ಬಂಧಿಸಲಾಗಿತ್ತು. ಆದರೆ ಪ್ರಮುಖ ಆರೋಪಿ ಬಿಜೇಶ್ ತನ್ನ ಪತ್ನಿಯ ಊರು ತಮಿಳುನಾಡಿಗೆ ಪರಾರಿಯಾಗಿದ್ದ. ಈ ಬಗ್ಗೆ ತನಿಖೆ ನಡೆಸಿದ ಪೊಲೀಸರು ಬಿಜೇಶ್‍ನನ್ನು ತಮಿಳುನಾಡಿನ ಮೆಟ್ಟುಪಾಳಯಂ ತಿರುವೂರುವಿನಲ್ಲಿ ಬಂಧಿಸಿದ್ದಾರೆ.

ಮಡಿಕೇರಿ ವಿಭಾಗದ ವೃತ್ತ ನಿರೀಕ್ಷಕ ಹಾಗೂ ಸಿದ್ದಾಪುರ ಠಾಣಾಧಿಕಾರಿಗಳ ಆದೇಶದ ಮೇರೆಗೆ ಸಿದ್ದಾಪುರ ಸಹಾಯಕ ಠಾಣಾಧಿಕಾರಿ ವಸಂತ್ ಕುಮಾರ್, ಸಿಬ್ಬಂದಿ ಸ್ವಾಮಿ ಕಾರ್ಯಾಚರಣೆ ನಡೆಸಿ ಆರೋಪಿ ಬಿಜೇಶ್‍ನನ್ನು ಬಂಧಿಸಿ ಮುಂದಿನ ಕ್ರಮಕೈಗೊಂಡಿದ್ದಾರೆ.