ವೀರಾಜಪೇಟೆ, ಜೂ. 15: ಅಮ್ಮತ್ತಿ ಬಳಿಯ ಹೊಸಕೋಟೆ ಕೆರೆಯಲ್ಲಿ ಮುಳುಗಿ ಇಬ್ಬರು ಕಾರ್ಮಿಕರು ಮೃತಪಟ್ಟ ಘಟನೆ ನಡೆದಿದೆ. ಕಳತ್‍ಮಾಡುವಿನ ಮಹೇಶ್ ಆಲಿಯಾಸ್ ರವಿ (39), ಹಾಗೂ ಅಣ್ಣು (28) ಮೃತ ದುರ್ದೈವಿಗಳಾಗಿದ್ದಾರೆ. ವೀರಾಜಪೇಟೆಯ ಉದ್ಯಮಿ ಸೂಫಿ ಎಂಬವರ ತೋಟದಲ್ಲಿ ಕಳೆದ ಮೂರು ವರ್ಷದಿಂದ ಕಾರ್ಮಿಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದ ಇಬ್ಬರು ಶುಕ್ರವಾರ ಬೆಳಿಗ್ಗೆ 8 ಗಂಟೆಗೆ ಪೆಡಲ್ ಬೋಟ್ ತೆಗೆದುಕೊಂಡು ಕೆರೆಯಲ್ಲಿ ಮೀನು ಹಿಡಿಯುತ್ತಿದ್ದಾಗ ಬೋಟ್ ಆಕಸ್ಮಿಕವಾಗಿ ಮಗುಚಿಕೊಂಡು ಮುಳುಗಿ ಮೃತ ಪಟ್ಟಿದ್ದಾರೆ. ಮಹೇಶ್ ವಿವಾಹಿತನಾಗಿದ್ದು, ಪತ್ನಿ ಹಾಗೂ ಇಬ್ಬರು ಮಕ್ಕಳನ್ನು ಅಗಲಿದ್ದಾರೆ. ಅಣ್ಣು ಅವಿವಾಹಿತ. ವೀರಾಜಪೇಟೆ ಗ್ರಾಮಾಂತರ ಪೋಲಿಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಕ್ಯೆಗೊಂಡಿದ್ದಾರೆ.