ಸಿದ್ದಾಪುರ, ಜೂ. 17: ಕಾಡಾನೆಗಳ ಹಿಂಡು ಮತ್ತೊಮ್ಮೆ ಮನೆಯ ಅಂಗಳಕ್ಕೆ ಲಗ್ಗೆ ಇಟ್ಟು ದಾಂಧಲೆ ನಡೆಸಿರುವ ಘಟನೆ ಸಿದ್ದಾಪುರದ ಪಾಲಿಬೆಟ್ಟ ರಸ್ತೆಯಲ್ಲಿ ಶನಿವಾರ ರಾತ್ರಿ ನಡೆದಿದೆ.

ಸಿದ್ದಾಪುರದ ಪಾಲಿಬೆಟ್ಟ ರಸ್ತೆಯಲ್ಲಿರುವ ದೇವಣಿರ ಬೋಪಣ್ಣ ಎಂಬವರ ಮನೆಯ ಅಂಗಳಕ್ಕೆ ಕಳೆದ ವಾರ ಕಾಡಾನೆಗಳ ಹಿಂಡು ಲಗ್ಗೆ ಇಟ್ಟು ಮನೆಯ ಮುಂಭಾಗದಲ್ಲಿದ್ದ ಪೀಠೋಪಕರಣಗಳನ್ನು ಧ್ವಂಸಗೊಳಿಸಿತ್ತು. ಅಲ್ಲದೇ ಮನೆಯ ಒಳಗೆ ನುಗ್ಗಲು ಯತ್ನಿಸಿತ್ತು. ಇದೀಗ ಶನಿವಾರದಂದು ಮತ್ತೊಮ್ಮೆ ಮರಿಯಾನೆಗಳು ಸೇರಿದಂತೆ 12ಕ್ಕೂ ಅಧಿಕ ಕಾಡಾನೆಗಳ ಹಿಂಡು ಬೋಪಣ್ಣ ಅವರ ಮನೆಯ ಅಂಗಳಕ್ಕೆ ಬಂದು ದಾಂಧಲೆ ನಡೆಸಿದಲ್ಲದೆ ಕಾಫಿ ತೋಟಕ್ಕೆ ನುಗ್ಗಿ ನೂರಾರು ಕಾಫಿ ಗಿಡಗಳನ್ನು ಧ್ವಂಸಗೊಳಿಸಿವೆ ಎಂದು ಬೋಪಣ್ಣ ‘ಶಕ್ತಿ’ ತಿಳಿಸಿದ್ದಾರೆ.

ಪಾಲಿಬೆಟ್ಟ ರಸ್ತೆಯಲ್ಲಿ ದಿನನಿತ್ಯ ಕಾಡಾನೆಗಳು ರಾತ್ರಿ ಸಮಯದಲ್ಲಿ ರಾಜಾರೋಷವಾಗಿ ಸುತ್ತಾಡುತ್ತಿದ್ದರೂ, ಗ್ರಾ.ಪಂ. ಬೀದಿ ದೀಪ ಅಳವಡಿಸದೇ ನಿರ್ಲಕ್ಷ್ಯ ವಹಿಸುತ್ತಿದ್ದು, ಹಲವಾರು ಬಾರಿ ತಿಳಿಸಿದ್ದರೂ ಕೂಡ ಗ್ರಾ.ಪಂ. ಆಸಕ್ತಿ ವಹಿಸುತ್ತಿಲ್ಲ. ಕೂಡಲೇ ಬೀದಿ ದೀಪ ಅಳವಡಿಸಬೇಕೆಂದು ಬೋಪಣ್ಣ ಒತ್ತಾಯಿಸಿದರು. -ವಾಸು