ಮಡಿಕೇರಿ, ಜೂ. 19: ನಿನ್ನೆ ಸುಂಟಿಕೊಪ್ಪ ಬಳಿಯ ಶಾಂತಗಿರಿ ತೋಟದ ಎದುರು ರಸ್ತೆಯಲ್ಲಿ ಬೈಕ್‍ವೊಂದಕ್ಕೆ ಕಾರೊಂದು ಡಿಕ್ಕಿ ಹೊಡೆದ ಪರಿಣಾಮ ಬೈಕ್ ಸವಾರ ಅಲ್ಲಿನ ಮುಳ್ಳೂರು ಗ್ರಾಮದ ಆನಂದ್ (40) ಎಂಬವರು ಇಂದು ಮಂಗಳೂರಿನ ವೆನ್‍ಲಾಕ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಕಾರಿಯಾಗದೆ ಸಾವನ್ನಪ್ಪಿದ್ದಾರೆ.

ನಿನ್ನೆ ಅಪರಾಹ್ನ ಅಪಘಾತ ಸಂಭವಿಸುವದರೊಂದಿಗೆ ತಲೆಗೆ ಮಾರಣಾಂತಿಕ ಪೆಟ್ಟಾಗಿ ಗಂಭೀರ ಗಾಯಗೊಂಡಿದ್ದ ಆನಂದ್ ಅವರನ್ನು ಮಂಗಳೂರು ಆಸ್ಪತ್ರೆಗೆ ಕರೆದೊಯ್ಯಲಾಗಿತ್ತು. ಅಲ್ಲಿ ಮಧ್ಯರಾತ್ರಿ ಚಿಕಿತ್ಸೆ ಫಲಕಾರಿಯಾಗದೆ ಗಾಯಾಳು ಕೊನೆಯುಸಿರೆಳೆದಿದ್ದಾರೆ.

ಈ ಸಂಬಂಧ ಕಾರು (ಕೆ.ಎ 19-ಎಂಸಿ3994) ಚಾಲಕ ಮಂಗಳೂರಿನ ಪ್ರೇಮಚಂದ್ರ ವಿರುದ್ಧ ಸುಂಟಿಕೊಪ್ಪ ಠಾಣಾಧಿಕಾರಿ ಜಯರಾಂ ಹಾಗೂ ಸಿಬ್ಬಂದಿ ಕಾನೂನು ಕ್ರಮ ಕೈಗೊಂಡಿದ್ದಾರೆ. ಮೃತ ಆನಂದ್ ಶವದ ಮರಣೋತ್ತರ ಪರೀಕ್ಷೆ ಬಳಿಕ ಬಂಧುವರ್ಗಕ್ಕೆ ವಹಿಸಲಾಗಿದೆ.