ಕುಶಾಲನಗರ, ಆ. 2: ಕುಶಾಲನಗರ ಪಟ್ಟಣದಲ್ಲಿ ಮಾರ್ಬಲ್ ತುಂಬಿದ ಶೆಡ್ ಒಂದಕ್ಕೆ ಬೆಂಕಿ ತಗುಲಿ ಒಳಗೆ ಇರಿಸಲಾಗಿದ್ದ ಬಹುತೇಕ ವಸ್ತುಗಳು ಭಸ್ಮವಾದ ಘಟನೆ ಬುಧವಾರ ತಡರಾತ್ರಿಯಲ್ಲಿ ನಡೆದಿದೆ. ಮೈಸೂರು ರಸ್ತೆಯಲ್ಲಿ ಪೆಟ್ರೋಲ್ ಬಂಕ್ ಎದುರುಗಡೆ ಇದ್ದ ಕಾವೇರಿ ಮಾರ್ಬಲ್ ಮತ್ತು ಟೈಲ್ಸ್ ಅಂಗಡಿಗೆ ಆಕಸ್ಮಿಕ ಬೆಂಕಿ ತಗುಲಿದೆ. ರಾತ್ರಿ ಅಂದಾಜು 1.30 ಗಂಟೆ ವೇಳೆಗೆ ಬೆಂಕಿ ಬಿದ್ದಿರುವ ಬಗ್ಗೆ ಅಂಗಡಿಯಲ್ಲಿ ಮಲಗಿದ್ದ ಹುಡುಗರು ಮಾಹಿತಿ ನೀಡಿದ್ದಾರೆ ಎಂದು ಮಾಲೀಕ ಪುರುಷೋತ್ತಮ್ ತಿಳಿಸಿದ್ದಾರೆ. ಅಂಗಡಿ ಒಳಭಾಗದಲ್ಲಿ ರಾತ್ರಿ ವೇಳೆ ಒಳ ವಿನ್ಯಾಸ ಕೆಲಸ ನಡೆಸುತ್ತಿದ್ದ ಕಾರ್ಮಿಕರು ಅಂಗಡಿಯಲ್ಲೇ ಮಲಗಿದ್ದರು ಎಂದು ಮಾಹಿತಿ ನೀಡಿದ್ದಾರೆ.

ಅಗ್ನಿಶಾಮಕ ದಳಕ್ಕೆ ಮಾಹಿತಿ ನೀಡಿ ಸ್ಥಳಕ್ಕೆ ಬರುವ ವೇಳೆಗೆ ಅಂಗಡಿ ಸಂಪೂರ್ಣ ಭಸ್ಮವಾಗಿದೆ. ಒಳಗಡೆ ಮಲಗಿದ್ದ ಮೂವರು ಕಾರ್ಮಿಕರು ಯಾವದೇ ಅಪಾಯವಿಲ್ಲದೆ ಪಾರಾಗಿದ್ದಾರೆ. ರಾತ್ರಿಯಿಂದ ಬೆಳಗಿನ ತನಕ ಅಗ್ನಿಶಾಮಕ ತಂಡದ ಮೂರು ವಾಹನಗಳು ಕಾರ್ಯಾಚರಣೆ ನಡೆಸಿ ಹೆಚ್ಚಿನ ಅನಾಹುತ ತಪ್ಪಿಸಿದ್ದಾರೆ. ಎದುರುಗಡೆ ಪೆಟ್ರೋಲ್ ಬಂಕ್ ಇದ್ದು ಭಾರೀ ಅನಾಹುತ ತಪ್ಪಿಸುವಲ್ಲಿ ಅಗ್ನಿಶಾಮಕ ಅಧಿಕಾರಿಗಳು ಯಶಸ್ವಿಯಾಗಿದ್ದಾರೆ.

ಲಕ್ಷಾಂತರ ಮೌಲ್ಯದ ಮಾರ್ಬಲ್ ಮತ್ತಿತರ ವಸ್ತುಗಳು ಬೆಂಕಿಗೆ ಆಹುತಿಯಾಗಿದ್ದು ನಷ್ಟದ ಬಗ್ಗೆ ಇನ್ನಷ್ಟೆ ಮಾಹಿತಿ ಒದಗಬೇಕಾಗಿದೆ.

ಮಾರ್ಬಲ್, ನೆಲಹಾಸುಗಳು, ಪಿಂಗಾಣಿ ವಸ್ತುಗಳ ಸಹಿತ ಕಚೇರಿ ಒಳಗಿದ್ದ ದಾಖಲೆ ಪತ್ರಗಳು ಕೂಡಾ ಸಂಪೂರ್ಣ ಭಸ್ಮವಾಗಿದೆ.