ಮಡಿಕೇರಿ, ಡಿ. 14: ಕರ್ನಾಟಕ ಜಾನಪದ ಪರಿಷತ್ತಿನ ಆಶ್ರಯದಲ್ಲಿ ರಾಮನಗರದ ಜಾನಪದ ಲೋಕದಲ್ಲಿ ಮುಂದಿನ ಜನವರಿ 6 ರಂದು ಬೆಳಿಗ್ಗೆ 9 ರಿಂದ ಸಂಜೆ 4 ರ ತನಕ, ರಾಜ್ಯಮಟ್ಟದ ಗೀತಗಾಯನ ಸ್ಪರ್ಧೆ ಏರ್ಪಡಿಸಲಾಗಿದೆ. ಇದುವರೆಗೆ ರಾಜ್ಯಮಟ್ಟದಲ್ಲಿ ಭಾಗವಹಿಸದೆ ಇರುವ ಹೊಸ ತಂಡಗಳಿಗೆ ಮಾತ್ರ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು 3 ರಿಂದ 5 ಮಂದಿ ತಂಡಕ್ಕೆ ಅವಕಾಶವಿದೆ. 15 ರಿಂದ 35 ವರ್ಷದೊಳಗಿನ ಜಾನಪದ ಕಲಾವಿದರು, ಪರಂಪರಾಗತ ಜನಪದ ಗೀತೆಗಳನ್ನು ಮಾತ್ರ ಹಾಡಬೇಕು. ಚರ್ಮ ವಾದ್ಯಗಳನ್ನು ಬಳಸಬೇಕು. ಸ್ಪರ್ಧಿಗಳಿಗೆ 10 ನಿಮಿಷ ಕಾಲಾವಕಾಶದೊಂದಿಗೆ ಯುವಕ - ಯುವತಿಯರು ಜಂಟಿ ಹಾಡು ಹಾಡಬಹುದು. ಹೆಚ್ಚಿನ ಮಾಹಿತಿಗೆ 080- 29782000, 9481641025ನಲ್ಲಿ ಸಂಪರ್ಕಿಸಬಹುದು.