ಗೋಣಿಕೊಪ್ಪ ವರದಿ, ಡಿ. 16: ಪೊನ್ನಂಪೇಟೆ ಟರ್ಫ್ ಮೈದಾನದಲ್ಲಿ ಹಾಕಿಕೂರ್ಗ್ ವತಿಯಿಂದ ನಡೆಯುತ್ತಿರುವ ಎ. ಡಿವಿಜನ್ ಹಾಕಿ ಲೀಗ್‍ನ ಭಾನುವಾರದ ಪಂದ್ಯಾವಳಿಯಲ್ಲಿ 4 ತಂಡಗಳು ಗೆಲವು ಪಡೆದುಕೊಂಡಿವೆ.

ಭಾನುವಾರದ ಪಂದ್ಯಗಳಲ್ಲಿ ಕೂಡಿಗೆ ಸ್ಪೋಟ್ರ್ಸ್ ಹಾಸ್ಟೆಲ್, ನಾಪೋಕ್ಲು ಶಿವಾಜಿ, ಪೊದ್ದ್‍ಮಾನಿ ಬ್ಲೂಸ್ಟಾರ್, ಪೊನ್ನಂಪೇಟೆ ಸ್ಪೋಟ್ರ್ಸ್ ಹಾಸ್ಟೆಲ್ ತಂಡಗಳು ಗೆಲವು ಪಡೆದವು. ಅಮ್ಮತ್ತಿ ಸ್ಪೋಟ್ರ್ಸ್ ಕ್ಲಬ್ ಹಾಗೂ ಮರ್ಕರಾ ಯುನೈಟೆಡ್ ನಡುವಿನ ಪಂದ್ಯ ಡ್ರಾ ಕಂಡಿದೆ.

ಅಮ್ಮತ್ತಿ ಸ್ಪೋಟ್ರ್ಸ್ ಕ್ಲಬ್ ಹಾಗೂ ಮರ್ಕರಾ ಯುನೈಟೆಡ್ ತಂಡಗಳ ಪಂದ್ಯ 2-2 ಗೋಲುಗಳಿಂದ ಟೈ ಆಯಿತು. ಅಮ್ಮತ್ತಿ ಪರ 10ನೇ ನಿಮಿಷದಲ್ಲಿ ಪೂವಣ್ಣ, 37ರಲ್ಲಿ ಮುಕೇಶ್, ಮರ್ಕರಾ ಪರ 16 ಹಾಗೂ 19ನೇ ನಿಮಿಷಗಳಲ್ಲಿ ಪ್ರತಿಕ್ 2 ಗೋಲು ಹೊಡೆದು ಮಿಂಚಿದರು.

ಪೊದ್ದ್‍ಮಾನಿ ಬ್ಲೂಸ್ಟಾರ್ ತಂಡ ಡಾಲ್ಫಿನ್ಸ್ ತಂಡವನ್ನು 6-0 ಗೋಲುಗಳಿಂದ ಮಣಿಸಿ ಸಂಚಲನ ಮೂಡಿಸಿತು. ಉತ್ತಯ್ಯ 2 ಗೋಲು (15 ಹಾಗೂ 45ನೇ ನಿ) ಹೊಡೆದು ಮಿಂಚಿದರು. 9ನೇ ನಿಮಿಷದಲ್ಲಿ ಮಾಚಯ್ಯ, 24ರಲ್ಲಿ ಮಧು, 42ರಲ್ಲಿ ಹರ್ಷಿತ್, 50ರಲ್ಲಿ ವಿಶಾಲ್ ಗೋಲು ಹೊಡೆದರು.

ಪೊನ್ನಂಪೇಟೆ ಸ್ಪೋಟ್ರ್ಸ್ ಹಾಸ್ಟೆಲ್ ತಂಡವು ಚಾರ್ಮರ್ಸ್ ವಿರುದ್ಧ 2-1 ಗೋಲುಗಳ ಜಯ ಸಾಧನೆ ಮಾಡಿತು. ಪೊನ್ನಂಪೇಟೆ ಪರ ಗೌತಂ 3 ಹಾಗೂ 25ನೇ ನಿಮಿಷಗಳಲ್ಲಿ 2 ಗೋಲು ಬಾರಿಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಚಾರ್ಮರ್ಸ್ ಪರ 31 ನೇ ನಿಮಿಷದಲ್ಲಿ ಪೊನ್ನಣ್ಣ ಏಕೈಕ ಗೋಲು ಹೊಡೆದರು.

ಕೂಡಿಗೆ ಸ್ಪೋಟ್ರ್ಸ್ ಹಾಸ್ಟೆಲ್ ತಂಡವು ಯುಎಸ್‍ಸಿ ಬೇರಳಿನಾಡ್ ತಂಡವನ್ನು 4-0 ಗೋಲುಗಳಿಂದ ಮಣಿಸಿತು. ಕೂಡಿಗೆ ಪರ 17ನೇ ನಿಮಿಷದಲ್ಲಿ ದೀಕ್ಷಿತ್, 25ರಲ್ಲಿ ಯಶ್ವಂತ್, 30ರಲ್ಲಿ ಕಿರಣ್, 44ರಲ್ಲಿ ರೋಹಿತ್ ತಲಾ ಒಂದೊಂದು ಗೋಲು ಬಾರಿಸಿ ಗೆಲುವಿನ ನಗೆ ಬೀರಲು ಕಾರಣಕರ್ತರಾದರು.

ಶಿವಾಜಿ ತಂಡವು ಬಲಮುರಿ ತಂಡದ ಎದುರು 4-0 ಗೋಲುಗಳ ಜಯ ಸಾಧನೆ ಮಾಡಿತು. ಶಿವಾಜಿ ಪರ 14ನೇ ನಿಮಿಷದಲ್ಲಿ ಪೆಮ್ಮಯ್ಯ, 17ರಲ್ಲಿ ಶುಭಂ, 21ರಲ್ಲಿ ಬಿಪಿನ್, 28ರಲ್ಲಿ ವಿಕಾಸ್ ತಲಾ ಒಂದೊಂದು ಗೋಲು ಹೊಡೆದರು.

- ಸುದ್ದಿಪುತ್ರ