ಗೋಣಿಕೊಪ್ಪ ವರದಿ, ಡಿ. 17: ಪೊನ್ನಂಪೇಟೆ ಟರ್ಫ್ ಮೈದಾನದಲ್ಲಿ ಹಾಕಿ ಕೂರ್ಗ್ ವತಿಯಿಂದ ನಡೆಯುತ್ತಿರುವ ಎ. ಡಿವಿಜóನ್ ಹಾಕಿ ಲೀಗ್‍ನಲ್ಲಿ ಬಲಮುರಿ, ಚಾರ್ಮರ್ಸ್, ಬೇಗೂರು ಈಶ್ವರ ಯೂತ್ ಕ್ಲಬ್, ಟಾಟಾ ಕಾಫಿ ಹಾಗೂ ಹಾತೂರು ಯೂತ್ ಕ್ಲಬ್ ತಂಡವು ಜಯದ ನಗೆ ಬೀರಿದವು.

ಬಲಮುರಿ ತಂಡವು ಬಿಬಿಸಿ ತಂಡವನ್ನು 1-0 ಗೋಲುಗಳ ಮೂಲಕ ಮಣಿಸಿತು. 41 ನೇ ನಿಮಿಷದಲ್ಲಿ ಬಲಮುರಿ ಪರ ಆದರ್ಶ್ ಏಕೈಕ ಗೋಲು ಹೊಡೆದು ಗೆಲವಿಗೆ ಕಾರಣರಾದರು.

ಚಾರ್ಮರ್ಸ್ ತಂಡವು ಅಮ್ಮತ್ತಿ ಸ್ಪೋಟ್ರ್ಸ್ ಕ್ಲಬ್ ವಿರುದ್ಧ 2-1 ಗೋಲುಗಳ ಜಯ ಸಾಧಿಸಿತು. ಚಾರ್ಮರ್ಸ್ ಪರ 29ನೇ ನಿಮಿಷದಲ್ಲಿ ದೀಪಕ್, 34 ರಲ್ಲಿ ಲಿವಿನ್, ಅಮ್ಮತ್ತಿ ಪರ 36 ರಲ್ಲಿ ರಾಘವೇಂದ್ರ ತಲಾ ಒಂದೊಂದು ಗೋಲು ಹೊಡೆದರು.

ಬೇಗೂರು ಈಶ್ವರ ಯೂತ್ ಕ್ಲಬ್ ತಂಡವು ಕೋಣನಕಟ್ಟೆ ಇಲೆವೆನ್ ತಂಡವನ್ನು 2-1 ಗೋಲುಗಳಿಂದ ಸೋಲಿಸಿತು. ಬೇಗೂರು ಪರ 22 ನೇ ನಿಮಿಷದಲ್ಲಿ ಮಂಜುನಾಥ್, 39 ರಲ್ಲಿ ಪ್ರಥ್ವಿ, ಕೋಣನಕಟ್ಟೆ ಪರ 10ನೇ ನಿಮಿಷದಲ್ಲಿ ಸಾವನ್ ಗೋಲು ಹೊಡೆದರು.

ಟಾಟಾ ಕಾಫಿ ತಂಡ ಪೊದ್ದ್‍ಮಾನಿ ಬ್ಲೂಸ್ಟಾರ್ ತಂಡದ ಎದುರು 3-2 ಗೋಲುಗಳ ಜಯ ಸಾಧನೆ ಮಾಡಿತು. ಟಾಟಾ ಪರ 22 ಹಾಗೂ 27ನೇ ನಿಮಿಷಗಳಲ್ಲಿ ದವನ್ ಜೋಡಿ ಗೋಲು ಹೊಡೆದರು. 9ರಲ್ಲಿ ಕಿರಣ್, ಪೊದ್ದ್‍ಮಾನಿ ಪರ 46 ಹಾಗೂ 48 ನೇ ನಿಮಿಷಗಳಲ್ಲಿ ಪೂವಯ್ಯ ಜೋಡಿಗೋಲು ಹೊಡೆದರು.

ಡಾಲ್ಫಿನ್ಸ್ ತಂಡ ಗೈರಾದ ಕಾರಣ ಹಾತೂರು ಯೂತ್ ಕ್ಲಬ್ ತಂಡವು ಜಯ ಪಡೆಯಿತು. -ಸುದ್ದಿಪುತ್ರ