ಗುಡ್ಡೆಹೊಸೂರು, ಏ. 17: ಸಿನಿಮೀಯ ರೀತಿಯ ಅವಘಡವೊಂದರಲ್ಲಿ ತರಕಾರಿ ಸಾಗಾಟ ಮಾಡುವ ವಾಹನವೊಂದು ರಸ್ತೆ ಬದಿಯಿರುವ ಮನೆಯೊಳಗೆ ನುಗ್ಗಿದ ಘಟನೆ ಇಲ್ಲಿಗೆ ಸಮೀಪದ ಬಸವನಹಳ್ಳಿಯಲ್ಲಿ ಸಂಭವಿಸಿದೆ.

ಇಂದು ಮುಂಜಾನೆ ವೇಳೆ ಕುಶಾಲನಗರ ಕಡೆಯಿಂದ ಮಡಿಕೇರಿ ಕಡೆಗೆ ತರಕಾರಿ ಸಾಗಿಸುತ್ತಿದ್ದ ಪಿಕ್‍ಅಪ್ ವಾಹನದ (ಕೆಎ-12 3298) ಚಾಲಕ ನಿದ್ರೆಗೆ ಜಾರಿದ್ದು, ವಾಹನ ಚರಂಡಿಗೆ ಇಳಿದಿದೆ. ಚರಂಡಿಯಲ್ಲಿಯೆ ಸುಮಾರು 100 ಮೀಟರ್‍ವರೆಗೆ ಸಾಗಿದ ವಾಹನ ರಸ್ತೆ ಬದಿಯ ನಿವಾಸಿ ಧರ್ಮ ಎಂಬವರ ಮನೆಯ ಬಳಿ ನಿಲ್ಲಿಸಿದ್ದ ಕಾರಿಗೆ ಡಿಕ್ಕಿಯಾಗಿದೆ. ನಿಯಂತ್ರಣಕ್ಕೆ ಬಾರದ ಪಿಕ್‍ಅಪ್ ಧರ್ಮ ಅವರ ಮನೆಗೆ ನುಗ್ಗಿ ಮಗುಚಿಕೊಂಡಿದೆ. ಭಾರೀ ಶಬ್ಧ ಕೇಳಿದ್ದರಿಂದ ಎಚ್ಚೆತ್ತ ಧರ್ಮ ಅವರ ಕುಟುಂಬದವರು ಎದ್ದುಬಂದು ನೋಡಿದಾಗ ವಾಹನ ಬಿದ್ದಿರುವುದು, ಮನೆಯೆದುರು ತರಕಾರಿಗಳು ಚೆಲ್ಲಾಪಿಲ್ಲಿಯಾಗಿ ರುವುದು ಗೋಚರಿಸಿದೆ. ವಾಹನ ಚಾಲಕ ಕುಮಾರ ಎಂಬಾತನಿಗೆ ಸಣ್ಣಪುಟ್ಟ ಗಾಯಗಳಾಗಿದ್ದು, ಕಾರು ಮಾಲೀಕ ಪುನೀತ್ ನೀಡಿರುವ ದೂರಿನ ಮೇರೆಗೆ ಕುಶಾಲನಗರ ಸಂಚಾರಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

-ಕುಡೆಕಲ್ ಗಣೇಶ್.