*ಸಿದ್ದಾಪುರ, ಏ.17 :ಕಾಡಾನೆಯೊಂದು ಹಸುವಿನ ಮೇಲೆ ದಾಳಿ ಮಾಡಿ ತೀವ್ರವಾಗಿ ಗಾಯಗೊಳಿಸಿರುವ ಘಟನೆ ಅಭ್ಯತ್ ಮಂಗಲದ ಚೆಟ್ಟಿಮೂಲೆ ಗ್ರಾಮದಲ್ಲಿ ನಡೆದಿದೆ.

ಸ್ಥಳೀಯ ನಿವಾಸಿ ಬಿ.ಎಸ್.ದಿನೇಶ್ ಅವರು ಇಂದು ಬೆಳಗ್ಗೆ ತಮ್ಮ ಗದ್ದೆಯಲ್ಲಿ ಮೇಯಲೆಂದು ಹಸುವನ್ನು ಕಟ್ಟಿ ಹಾಕಿದ್ದರು. ಸುಮಾರು 11.30 ಗಂಟೆಗೆ ಏಕಾಏಕಿ ದಾಳಿ ಮಾಡಿದ ಕಾಡಾನೆ ತನ್ನ ದಂತದಿಂದ ಹಸುವಿನ ಕುತ್ತಿಗೆಯನ್ನು ಚುಚ್ಚಿ ಗಾಯಗೊಳಿಸಿದೆ. ಹೊಟ್ಟೆಯ ಭಾಗಕ್ಕೂ ಗಾಯವಾಗಿದ್ದು, ಸ್ಥಳಕ್ಕೆ ಪಶು ವೈದ್ಯಾಧಿಕಾರಿ ಡಾ.ಹೇಮಂತ್ ಕುಮಾರ್ ಶಿಂಧೆ ಭೇಟಿ ನೀಡಿ ಗಾಯಗಳಿಗೆ ಹೊಲಿಗೆ ಹಾಕಿದ್ದಾರೆ.

ಅರಣ್ಯ ಅಧಿಕಾರಿಗಳಾದ ಮೀನುಕೊಲ್ಲಿಯ ಸುಬ್ಬಯ್ಯ ಹಾಗೂ ಕುಶಾಲನಗರದ ಅನನ್ಯ ಕುಮಾರ್ ಕಾಡಾನೆ ದಾಳಿ ನಡೆಸಿದ ಸ್ಥಳ ಪರಿಶೀಲನೆ ನಡೆಸಿದರು. ಗ್ರಾಮಸ್ಥರು ಆತಂಕಕ್ಕೀಡಾಗಿದ್ದು, ಅರಣ್ಯ ಇಲಾಖೆ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ. -ಸುಧಿ