ಕಣಿವೆ/ಕುಶಾಲನಗರ, ಸೆ. 30: ವಿಶ್ವವಿಖ್ಯಾತ ಮೈಸೂರು ದಸರಾ ಈ ಬಾರಿ ಸರಳವಾಗಿ ಆಚರಣೆ ಯಾಗಲಿದ್ದರೂ ಕೂಡ ವಾಡಿಕೆಯಂತೆ ದುಬಾರೆ ಸಾಕಾನೆ ಶಿಬಿರದಿಂದ ನಾಲ್ಕು ಸಾಕಾನೆಗಳನ್ನು ಬುಧವಾರ ಸಂಜೆ ಕಳುಹಿಸಲಾಯಿತು. ಕುಶಾಲನಗರ ವಲಯ ಅರಣ್ಯಾಧಿಕಾರಿ ಅನನ್ಯಕುಮಾರ್ ಉಪಸ್ಥಿತಿಯಲಿ ಆನೆಕಾಡು ಶಿಬಿರದಿಂದ 43 ವರ್ಷದ ಕಾವೇರಿ, 61 ವರ್ಷದ ವಿಜಯ, 57 ವರ್ಷದ ವಿಕ್ರಮ, 39 ವರ್ಷದ ಗೋಪಿ ಇವುಗಳನ್ನು ಕಳುಹಿಸಲಾಯಿತು. ಈ ಸಂದರ್ಭದಲ್ಲಿ ಕಾವೇರಿ ಆನೆಯ ಮಾವುತ ಜೆ.ಕೆ. ಡೋಬಿ, ಮಾವುತ ರಂಜನ್, ವಿಜಯ ಆನೆಯ ಮಾವುತ ಭೋಜಪ್ಪ, ಕಾವಾಡಿ ಭರತ, ವಿಕ್ರಮ ಆನೆಯ ಮಾವುತ ಪುಟ್ಟ, ಕಾವಾಡಿ ಹೇಮಂತ್ ಹಾಗೂ ಗೋಪಿ ಆನೆಯ ಮಾವುತ ನಾಗರಾಜು, ಕಾವಾಡಿ ಶಿವು ಅವರ ಕುಟುಂಬ ಸದಸ್ಯರನ್ನು ಕೂಡ ಮೈಸೂರಿಗೆ ಕಳುಹಿಸಿಕೊಡಲಾಯಿತು.