ಮಡಿಕೇರಿ, ಅ. 12: ತಾ. 17 ರಂದು ನಡೆಯುವ ಕಾವೇರಿ ಮಾತೆಯ ಜಾತ್ರೆ ಪ್ರಯುಕ್ತ ಬಡ್ಡಿರ ಪೃತ್ವಿ ಮಂದಣ್ಣ ಮತ್ತು ಬೊಳಂದಂಡ ರೋಹನ್ ನಾಚಪ್ಪ ಇವರುಗಳ ನೇತೃತ್ವದಲ್ಲಿ ಕಾರುಗುಂದ, ಕಡಿಯತ್ತೂರು, ಬೇಂಗೂರು, ಕೊಟ್ಟೂರು, ಚೇರಂಬಾಣೆ, ಬಾಡಗ, ಕೋಪಟ್ಟಿ ಮತ್ತು ಚೆಟ್ಟಿಮಾನಿ ಗ್ರಾಮದ ಸುಮಾರು 70 ಕಾರ್ಯಕರ್ತರು ಕಾರುಗುಂದ ಮುಖ್ಯ ರಸ್ತೆಯಿಂದ ಭಾಗಮಂಡಲ ದೇವಸ್ಥಾನದ ದ್ವಾರದ ವರೆಗೆ ರಸ್ತೆಯ 2 ಬದಿಯಲ್ಲಿ ತ್ಯಾಜ್ಯ ವಸ್ತುಗಳನ್ನು ಹೆಕ್ಕಿ ರಸ್ತೆಯ 2 ಬದಿಯನ್ನು ಸ್ವಚ್ಛಗೊಳಿಸಿದರು.

ಈ ಶ್ರಮದಾನಕ್ಕೆ ಕಾರುಗುಂದ ರಸ್ತೆಯ ಬದಿಯಲ್ಲಿರುವ ಕುಮಾರಿಸ್ ಕಿಚನ್‍ನ ಮಣಿ ಕುಂಞಪ್ಪ ಅವರು ಕಾರ್ಯಕರ್ತರಿಗೆ ಬೆಳಗ್ಗಿನ ಕಾಫಿ ಮತ್ತು ಮಧ್ಯಾಹ್ನದ ಊಟದ ವ್ಯವಸ್ಥೆಯನ್ನು ಕಲ್ಪಿಸಿದ್ದರು.