ಮಡಿಕೇರಿ, ಸೆ. ೪: ಚಳಿ-ಗಾಳಿ-ಮಳೆಯ ನಡುವೆಯೂ ಬೆಳಗ್ಗಿನ ಜಾವ ಮನೆಮನೆಗೆ ಪತ್ರಿಕೆಗಳನ್ನು ವಿತರಿಸುವ ಪತ್ರಿಕಾ ವಿತರಕರ ಶ್ರಮವನ್ನು ಗುರುತಿಸಲು ಪ್ರತಿ ವರ್ಷ ಸೆಪ್ಟೆಂಬರ್ ೪ ರಂದು ಪತ್ರಿಕಾ ವಿತರಕರ ದಿನಾಚರಣೆಯನ್ನು ಆಚರಿಸಲಾಗುತ್ತದೆ. ಈ ಪ್ರಯುಕ್ತ ಇಂದು ಮಡಿಕೇರಿಯ ಪತ್ರಿಕಾ ವಿತರಕರಿಗೆ ಪ್ರಜಾವಾಣಿ ಪ್ರಸರಣಾ ವಿಭಾಗ ಮುಖ್ಯಸ್ಥ ನಾಗೇಶ್ ಅವರು ಸಿಹಿ ಹಂಚಿ ಶುಭ ಹಾರೈಸಿದರು. ಈ ಸಂದರ್ಭ ಪತ್ರಿಕಾ ವಿತರಕ ಟಿ.ಜಿ. ಸತೀಶ್ ಹಾಜರಿದ್ದರು. ಮಡಿಕೇರಿ ನಿವಾಸಿ ಗೀತಾ ಗಿರೀಶ್ ಅವರು ಪತ್ರಿಕಾ ವಿತರಕ ರವಿ ಅವರಿಗೆ ಹಣ್ಣು ಹಂಪಲು ನೀಡಿ ಗೌರವಿಸಿದರು.ಸೋಮವಾರಪೇಟೆ: ತಾಲೂಕು ಕಾರ್ಯನಿರತ ಪತ್ರಕರ್ತರ ಸಂಘದ ವತಿಯಿಂದ ಸ್ಥಳೀಯ ಪತ್ರಿಕಾ ಭವನದಲ್ಲಿ ಪತ್ರಿಕೆ ವಿತರಕರ ದಿನವನ್ನು ಆಚರಿಸಲಾಯಿತು. ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ತಾಲೂಕು ಸಂಘದ ಅಧ್ಯಕ್ಷ ಹೆಚ್.ಆರ್. ಹರೀಶ್ ವಹಿಸಿದ್ದರು. ಪಟ್ಟಣದ ಶಿವ ಬುಕ್ ಸ್ಟಾಲ್‌ನ ಪತ್ರಿಕಾ ವಿತರಕರಾದ ಜಯಂತ್, ಗುಡ್ಡೆಹೊಸೂರಿನ ವಿತರಕರಾದ ಕುಡೆಕಲ್ ಗಣೇಶ್ ಅವರುಗಳನ್ನು ಸನ್ಮಾನಿಸಲಾಯಿತು.

ಈ ಸಂದರ್ಭ ತಾಲೂಕು ಸಂಘದ ಉಪಾಧ್ಯಕ್ಷ ಲೋಕೇಶ್‌ಸಾಗರ್, ಪ್ರಧಾನ ಕಾರ್ಯದರ್ಶಿ ವಿಜಯ್ ಹಾನಗಲ್, ಖಚಾಂಚಿ ಬಿ.ಎ. ಭಾಸ್ಕರ್, ಪತ್ರಿಕಾಭವನ ಟ್ರಸ್ಟ್ ಅಧ್ಯಕ್ಷ ಎಸ್.ಮಹೇಶ್ ಸೇರಿದಂತೆ ತಾಲೂಕು ಸಂಘದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.