ಮುಳ್ಳೂರು, ಅ. ೨೬: ತಮಿಳುನಾಡು ಚೆನೈನ ಎಗ್ಮೂರು ಕ್ರೀಡಾಂಗಣದಲ್ಲಿ ನಡೆದ ಸಬ್ ಜೂನಿಯರ್ಸ್ ಹಾಕಿ ಪಂದ್ಯಾವಳಿಯಲ್ಲಿ ಕರ್ನಾಟಕವನ್ನು ಪ್ರತಿನಿಧಿಸಿದ್ದ ಕೊಡಗು ಜಿಲ್ಲೆಯ ಸೋಮವಾರಪೇಟೆ ತಾಲೂಕಿನ ಗೌಡಳ್ಳಿ ಗ್ರಾ.ಪಂ. ವ್ಯಾಪ್ತಿಯ ಹೆಗ್ಗುಳ ಗ್ರಾಮದ ಕೃಷಿಕರಾದ ಎಚ್.ಎ.ಯತೀಶ್ ಮತ್ತು ಎಚ್.ವೈ. ಅನಿತ ದಂಪತಿ ಪುತ್ರ ವಿ.ವೈ. ಶಶಿತ್‌ಗೌಡ ಅವರನ್ನು ಶನಿವಾರಸಂತೆಯಲ್ಲಿ ಸ್ವಾಗತಿಸಲಾಯಿತು.
ಪಟ್ಟಣದ ಕೆಆರ್‌ಸಿ ವೃತ್ತದಲ್ಲಿ ಬಾಲಕ ಶಶಿತ್‌ಗೌಡನಿಗೆ ಹೂವಿನ ಹಾರ ಹಾಕಿ ಸ್ವಾಗತಿಸಲಾಯಿತು. ನಂತರ ಸಾರ್ವಜನಿಕರು ಪಟಾಕಿ ಸಿಡಿಸಿ ಸಂಭ್ರಮಿಸಿದರು. ತದನಂತರ ತೆರೆದ ವಾಹನದಲ್ಲಿ ಶಶಿತ್‌ಗೌಡನನ್ನು ಮನೆಗೆ ಕರೆತಂದರು.
ಈ ಸಂದರ್ಭದಲ್ಲಿ ಶಶಿತ್‌ಗೌಡ ತಂದೆ ಎಚ್.ಎ. ಯತೀಶ್, ಗ್ರಾಮಸ್ಥರಾದ ಸಜು ನವೀನ್, ವರ್ತಕರುಗಳಾದ ಟಿ.ಆರ್. ವೆಂಕಟೇಶ್, ಆಂಥೋಣಿ ಲೊಗೊ, ನಿವೃತ್ತ ಗ್ರಂಥಪಾಲಕ ಮಹೇಶ್, ಗೌಡಳ್ಳಿ ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷ ಎಚ್.ಆರ್.ಸುರೇಶ್, ಸಂಘದ ಸಿಇಒ ಪೊನ್ನಪ್ಪ ಹಾಗೂ ಹೆಗ್ಗುಳ ಗ್ರಾಮಸ್ಥರು ಹಾಜರಿದ್ದರು.