ಸಿದ್ದಾಪುರ, ನ. ೧೪: ತಡರಾತ್ರಿ ಕಾಡಾನೆಯೊಂದು ವ್ಯಕ್ತಿಯೋರ್ವರ ಮೇಲೆ ಧಾಳಿ ನಡೆಸಿದ ಪರಿಣಾಮ ಹಾಡಿಯ ನಿವಾಸಿಯ ಬಲ ಕೈ ಮೂಳೆ ಮುರಿದಿದೆ.

ಚೆನ್ನಯ್ಯನಕೋಟೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಗೆ ಒಳಪಡುವ ಚೆನ್ನಂಗಿ ಗ್ರಾಮದ ಬಸವನಳ್ಳಿ ಹಾಡಿಯ ನಿವಾಸಿಯಾಗಿರುವ ಜೆ.ಹೆಚ್. ಅಪ್ಪಣ್ಣ ಎಂಬವರ ಮನೆಯ ಮುಂಭಾಗದಲ್ಲಿ ಕಾಡಾನೆಗಳು ದಾಂಧಲೆ ನಡೆಸುತ್ತಿತ್ತು. ಈ ಸಂದರ್ಭದಲ್ಲಿ ಅಪ್ಪಣ್ಣ ಮನೆಯ ಬಾಗಿಲು ತೆರೆದು ನೋಡುವಷ್ಟರಲ್ಲಿ ಕಾಡಾನೆಯೊಂದು ಏಕಾಏಕಿ ಸೊಂಡಿಲಿನಿAದ ಗುದ್ದಿದ ಪರಿಣಾಮ ಅಪ್ಪಣ್ಣನ ಬಲಭಾಗದ ಕೈ ಮೂಳೆ ಸಂಪೂರ್ಣ ಮುರಿದಿದೆ.

ಅಪ್ಪಣ್ಣ ಕಿರುಚಿಕೊಂಡಾಗ ಕುಟುಂಬಸ್ಥರು ಬರುವಷ್ಟರಲ್ಲಿ ಆನೆಯೂ ಅಲ್ಲಿಂದ ಓಡಿ ಹೋಗಿದೆ. ನಂತರ ತಡರಾತ್ರಿ ೨ ಗಂಟೆಯ ಸಮಯಕ್ಕೆ ಅಪ್ಪಣ್ಣನ ಮಗ ಮಹೇಶ್ ಅರಣ್ಯ ಇಲಾಖಾಧಿಕಾರಿಗಳಿಗೆ ಮಾಹಿತಿ ನೀಡಿದ ಮೇರೆಗೆ ವಲಯ ಆರೋಗ್ಯ ಇಲಾಖಾಧಿಕಾರಿ ದೇವರಾಜ್ ಅವರ ಮಾರ್ಗದರ್ಶನದ ಮೇರೆಗೆ ಉಪ ವಲಯ ಅರಣ್ಯಾಧಿಕಾರಿ ಚೆನ್ನವೀರ್ ಹಾಗೂ ಚೆನ್ನಂಗಿ ವ್ಯಾಪ್ತಿಯ ಅರಣ್ಯ ರಕ್ಷಕ ಹಾಗೂ ವೀಕ್ಷಕ ತಿಮ್ಮಣ್ಣ, ಅರಣ್ಯ ಇಲಾಖೆಗೆ ಸೇರಿದ ಜೀಪಿನಲ್ಲೇ ಜಿಲ್ಲಾಸ್ಪತ್ರೆಗೆ ಗಾಯಾಳು ಅಪ್ಪಣ್ಣರನ್ನು ಕರೆತಂದು ಚಿಕಿತ್ಸೆಗೆ ದಾಖಲಿಸಿದ್ದಾರೆ. ಅದೃಷ್ಟವಶಾತ್ ಅಪ್ಪಣ್ಣ ಪ್ರಾಣಾಪಾಯದಿಂದ ಪಾರಾಗಿದ್ದಾರೆ.